Afg‘oniston prezidentligiga nomzod saylovchilarning ovozlarini qalbakilashtirish davlatga xiyonat ekanligini qayd etdi

Afg‘oniston islom respublikasi prezidentligi uchun kurashgan Rahmatulla Nabil saylovlar vaqtida fuqarolarning ovozlarini qalbakilashtirganligi isbotlangan nomzodlar va ularning tarafdorlarini davlatga xiyonat qilganlikda va mamlakat konstitutsiyasi me’yorlarini buzganlikda aybdor deb topish lozimligini bildirdi, deb yozmoqda Regnum.

Rahmatilla Nabil ushbu bayonotni Twitter’dagi o‘z rasmiy sahifasida e’lon qilgan. U o‘z tvitida aynan kim tomonidan mamlakat saylov qonunchiligi buzilganini aniq aytmadi, lekin saylovlardagi tizimli ravishda qonunbuzilish holatlari va o‘z saylovoldi kampaniyasi uchun davlat resurslaridan foydalanganlar qilmishlari uchun sud oldida javob berishi lozimligiga urg‘u berdi.

Afg‘oniston Mustaqil saylov komissiyasi Nabilning bayonotiga javoban davlat organining saylovlar vaqtida kuzatilgan qonunbuzarlik holatlarning o‘rganilishi va aybdorlar tegishliligi bo‘yicha javobgarlikka tortilishini ma’lum qildi.

Avval Rahmatilla Nabil amaldagi prezident Muhammad Ashraf G‘ani hamda hukumat bosh vaziri Abdulla Abdulla biometrik tizimlarsiz berilgan ovozlarni hisob-kitob qilishga Oliy sud ruxsatini olishga urinayotgani va ushbu harakat amalga oshsa, mamlakat fuqarolarining saylov komissiyasiga bo‘lgan ishonchi yo‘qolishini bildirgandi. Boshqa bir nomzod Afg‘oniston Islom partiyasi rahbari Gulbeddin Hikmatyor esa saylovlarni qayta o‘tkazish uchun muvaqqat hukumat tashkil etishni taklif qilgan.

Afg‘onistonda prezidentlik saylovlari 28-sentabrda o‘tkazilgan. Ovoz berish jarayonlari “Tolibon” harakatining saylovlarni buzishga urinish haqidagi bayonotidan so‘ng xavfsizlik choralari kuchaytirilgan vaziyatda o‘tdi. Biroq saylovlar oldidan va saylovlar o‘tkaziladigan sanada mamlakat bo‘ylab teraktlar, portlashlar, kuzatuvchilarning o‘g‘irlab ketilishi holatlari kuzatilgan. Saylovlarda jami 15 nafar prezidentlikka nomzod ishtirok etdi, kurash uch asosiy siyosiy guruh o‘rtasida kechdi: amaldagi prezident Muhammad Ashraf G‘ani, amaldagi bosh vazir Abdulla Abdulla hamda muxolifat, ya’ni sobiq prezident Hamid Karzay guruhi. Avvaliga prezidentlikka o‘z nomzodini qo‘yganlar soni 18 ta edi, biroq ularning uch nafari amaldagi prezidentni qo‘llab-quvvatlashini bildirib, o‘z nomzodini oldi.