Ekspertlarga ko‘ra, Afg‘onistonda boshlangan prezidentlik saylovlarida uchta asosiy siyosiy guruh shakllanganini ko‘rish mumkin. Bu haqda Afghanistan.ru xabar bermoqda.

Amaldagi prezident guruhi

Foto: “Down”

Ashraf G‘ani shaxsiy omillari va siyosiy ittifoqdoshlariga nisbatan ikkilanishlar tufayli siyosiy izolyatsiyada qoldi. Biroq bu inqirozni yengib o‘tish uchun u anchayin tavakkkal ishga qo‘l urdi va deyarli amalga oshirishga ulgurdi — o‘z atrofida asosan yoshlar hisobiga yangi siyosiy doirani shakllantirdi. Etnik jihatdan esa G‘ani pushtunlarning ovoziga umid qilmoqda.

Amaldagi bosh vazir guruhi

Foto: “Down”

Abdulla Abdulla pushtun bo‘lmagan millatlarning asosiy yetakchilari kirgan, etnik jihatdan keng saylovoldi jamoasini shakllantirishga muvaffaq bo‘ldi. Asosiy yetakchilari Abdullani qo‘llab-quvvatlaydigan afg‘onistonlik xazoriylar va o‘zbeklar eng intizomli saylovchilar hisoblanadi. Shuningdek, Abdullaning nomzodini mujohidlar ham ma’qullaydi.

O‘tish davri hukumati tarafdorlari guruhi

Foto: Afganistan.ru

Hozirda uning yetakchisi sifatida Afg‘oniston sobiq prezidenti Hamid Karzayni aytish mumkin. Uning tashabbusi bilan mazkur guruhning ikkita yig‘ilishi o‘tkazildi. Yig‘ilish qatnashchilari saylovlarni boshqa vaqtga qoldirish haqidagi fikrni ilgari surgan. Afg‘oniston prezidentining milliy xavfsizlik masalalari bo‘yicha sobiq maslahatchisi Muhammad Xanif Atmar guruhi a’zolari va boshqa ikki blokda qo‘nim topmagan siyosatchilar ushbu fraksiya o‘zagi hisoblanadi. Saylovlarga qarshi chiqqan “Tolibon” jangarilarini ham taktik jihatdan ularning ittifoqdoshi sanash mumkin.

Oxirgi tadqiqotlar natijasiga ko‘ra, saylovlar tarafdori bo‘lgan nomzodlarning (Ashraf G‘ani va Abdulla Abdulla) g‘oliblik imkoniyatlari deyarli teng: tegishli ravishda 18,65 va 19,41 foiz.