Yevropa kengashi Brexit muddatini 2020-yil 31-yanvargacha uzaytirish haqida qaror qabul qildi. Bu haqda Bryusselda 29-oktabr, seshanba kuni tarqatilgan kommyunikeda ma’lum qilingan, deya xabar beradi “Interfaks”.
“Buyuk Britaniya Yevroittifoqdan chiqishi to‘g‘risidagi kelishuv ratifikatsiya qilinishi uchun ko‘proq vaqt berish maqsadida muddat 2020-yil 31-yanvargacha uzaytirildi. Agar kelishuv ikkala tomondan ham ratifikatsiya qilinsa, tuzilmadan chiqish 2019-yil 1-dekabrgacha yoki 2020-yil 1-yanvargacha amalga oshirilishi ham mumkin”, — deyiladi kommyunikeda.
Hujjatda Buyuk Britaniya uzaytirilgan muddat davomida Yevroittifoqning barcha huquq va majburiyatlarga ega a’zo davlati bo‘lib qolishi qayd etilgan.
Ushbu qaror Yevroittifoqqa a’zo 27 davlat yetakchilari tomonidan ma’qullanganidan so‘ng Yevropa kengashi tomonidan bir ovozdan qabul qilindi.
Izoh (0)