Vazirlar Mahkamasida 29-oktabr kuni O‘zbekistonni rivojlantirishning beshta ustuvor yo‘nalishi bo‘yicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturida belgilangan Ijtimoiy sohani rivojlantirishning ustuvor yo‘nalishlarini amalga oshirish bo‘yicha Komissiya majlisi bo‘lib o‘tdi.
Unda senator Zayniddin Nizomxo‘jayev Davlat dasturida belgilangan topshiriqlar ijrosini ta’minlash bo‘yicha 2019-yilning to‘qqiz oyi mobaynida amalga oshirilgan ishlar haqida axborot berarkan, dasturning 192-bandida belgilangan tarixiy shaxslar va milliy obrazlar aks etgan animatsion filmlar yaratish topshirig‘i bajarilmagani ta’kidlab o‘tdi.
“Lekin, afsuski, yil davomida birorta ham tarixiy siymolarimiz gavdalantirilgan animatsion film ko‘rmadik. Shuning uchun ham bolalarimiz xorijiy qahramonlarga taqlid qilib ulg‘ayishga majbur bo‘lmoqda. Vaholanki, O‘zbekkino milliy agentligiga davlat byudjetidan milliardlab so‘m mablag‘lar ajratilmoqda”, — deya senatorning so‘zlaridan iqtibos keltirmoqda “Daryo” muxbiri.Davlat dasturiga muvofiq, “O‘zbekkino” milliy agentligi yil davomida O‘zMTRK, Respublika ma’naviyat va ma’rifat markazi va O‘zbekiston Yozuvchilar uyushmasi bilan birgalikda milliy qahramonlar va obrazlar (Alpomish, Shiroq, To‘maris, Xo‘ja Nasriddin va boshqalar), shuningdek, zamonaviy mavzudagi animatsion filmlar yaratishi kerak edi. Bundan tashqari, dasturda “dunyo bolalari sevib tomosha qiladigan mashhur multfilmlar darajasidagi o‘zbek multfilmini dunyoga tanitadigan milliy qahramonlar obrazini yaratish” ham nazarda tutilgan edi.
2019-yil boshida Maktabgacha ta’lim vazirligi va Axborot va ommaviy kommunikatsiyalar agentligi tomonidan “Eng yaxshi bolalar qahramoni/qahramonlar guruhi” ko‘rik-tanlovi o‘tkazilgan, unda yosh rassom Tohir Islomovning “Buyuk bolakaylar” nomli personajlar guruhi g‘olib deb topilgan edi. O‘shanda tanlovga taqdim etilgan personajlar “yaqin kelajakda multfilm, ertak va hikoya qahramonlari bo‘lib, bolalar orasiga, ularning qalbiga kirib boradi”, deb aytilgan edi.
Avvalroq “O‘zbekkino” milliy agentligi huzuridagi “Multplikatsion filmlar studiyasi” direktori vazifasini bajaruvchi rejissor Dmitriy Vlasov O‘zbekistonda ishlab chiqarilgan multfilm mahsulotlarining 90 foizi telekanallar orqali namoyish etilmasligini ma’lum qilgan edi. Xususan, u O‘zMTRKning “Bolajon” telekanali milliy multfilmlarga e’tibor qaratmasligini tanqid qilgandi.
Izoh (0)