Вазирлар Маҳкамасида 29 октябрь куни Ўзбекистонни ривожлантиришнинг бешта устувор йўналиши бўйича Ҳаракатлар стратегиясини «Фаол инвестициялар ва ижтимоий ривожланиш йили»да амалга оширишга оид Давлат дастурида белгиланган Ижтимоий соҳани ривожлантиришнинг устувор йўналишларини амалга ошириш бўйича Комиссия мажлиси бўлиб ўтди.
Унда сенатор Зайниддин Низомхўжаев Давлат дастурида белгиланган топшириқлар ижросини таъминлаш бўйича 2019 йилнинг тўққиз ойи мобайнида амалга оширилган ишлар ҳақида ахборот бераркан, дастурнинг 192-бандида белгиланган тарихий шахслар ва миллий образлар акс этган анимацион фильмлар яратиш топшириғи бажарилмагани таъкидлаб ўтди.
«Лекин, афсуски, йил давомида бирорта ҳам тарихий сиймоларимиз гавдалантирилган анимацион фильм кўрмадик. Шунинг учун ҳам болаларимиз хорижий қаҳрамонларга тақлид қилиб улғайишга мажбур бўлмоқда. Ваҳоланки, Ўзбеккино миллий агентлигига давлат бюджетидан миллиардлаб сўм маблағлар ажратилмоқда», — дея сенаторнинг сўзларидан иқтибос келтирмоқда «Дарё» мухбири.Давлат дастурига мувофиқ, «Ўзбеккино» миллий агентлиги йил давомида ЎзМТРК, Республика маънавият ва маърифат маркази ва Ўзбекистон Ёзувчилар уюшмаси билан биргаликда миллий қаҳрамонлар ва образлар (Алпомиш, Широқ, Тўмарис, Хўжа Насриддин ва бошқалар), шунингдек, замонавий мавзудаги анимацион фильмлар яратиши керак эди. Бундан ташқари, дастурда «дунё болалари севиб томоша қиладиган машҳур мултфильмлар даражасидаги ўзбек мултфильмини дунёга танитадиган миллий қаҳрамонлар образини яратиш» ҳам назарда тутилган эди.
2019 йил бошида Мактабгача таълим вазирлиги ва Ахборот ва оммавий коммуникациялар агентлиги томонидан «Энг яхши болалар қаҳрамони/қаҳрамонлар гуруҳи» кўрик-танлови ўтказилган, унда ёш рассом Тоҳир Исломовнинг «Буюк болакайлар» номли персонажлар гуруҳи ғолиб деб топилган эди. Ўшанда танловга тақдим этилган персонажлар «яқин келажакда мултфильм, эртак ва ҳикоя қаҳрамонлари бўлиб, болалар орасига, уларнинг қалбига кириб боради», деб айтилган эди.
Аввалроқ «Ўзбеккино» миллий агентлиги ҳузуридаги «Мултпликацион фильмлар студияси» директори вазифасини бажарувчи режиссёр Дмитрий Власов Ўзбекистонда ишлаб чиқарилган мултфильм маҳсулотларининг 90 фоизи телеканаллар орқали намойиш этилмаслигини маълум қилган эди. Хусусан, у ЎзМТРКнинг «Болажон» телеканали миллий мултфильмларга эътибор қаратмаслигини танқид қилганди.
Изоҳ (0)