O‘zbekistonning Jidda shahri (Saudiya Arabistoni podshohligi)dagi Bosh konsulxonasi 23-oktabr kuni Madina islom universitetida tahsil olayotgan O‘zbekiston fuqarolari bilan sayyor uchrashuv o‘tkazdi, deya xabar bermoqda TIV matbuot xizmati.
Uchrashuvda Bosh konsul Sirojiddin Shamsutdinov talabalarga xorijda yurgan O‘zbekiston fuqarolarining huquq va manfaatlarini himoya qilish bilan bog‘liq kompleks masalalarni hal qilish borasida O‘zbekistonda amalga oshirilayotgan chora-tadbirlar haqida so‘zlab bergan.
“Davlat yoshlar siyosatining samarali ro‘yobga chiqarilishini ta’minlash mamlakatimiz rahbariyati diqqat markazida turgan muhim masalalardan biri hisoblanishi ta’kidlandi”, — deyiladi TIV axborotida.
Suhbat jarayonida 22-dekabr kuni O‘zbeksitonda bo‘lib o‘tadigan parlament sayloviga tayyorgarlik mavzusiga alohida e’tibor qaratilgan. Talabalar Jidda shahridagi Bosh konsulxona huzurida saylov uchastkasi tuzilganidan xabardor qilingan.
Tadbir doirasida Saudiya Arabistonida bo‘lib turgan o‘zbekistonliklarning huquqiy savodxonligini oshirish bo‘yicha tegishli maslahatlar berilgan. Xususan, O‘zbekiston pasport tizimida joriy qilingan o‘zgarish va yangiliklar to‘g‘risida ma’lumot berilgan, savollarga, jumladan vatandoshlarga konsullik-huquqiy yordam ko‘rsatishga taalluqli savollarga javoblar qaytarilgan hamda Saudiya Arabistoni qonunchiligi bo‘yicha yuridik maslahatlar berilgan.
Izoh (0)