Unda jurnalistlar tadbirga yig‘ilgan besh partiya vakillariga shunday savol bilan murojaat qildi: “O‘zLiDeP saylovlarda g‘alaba qozonsa, bosh vazir lavozimiga kimni nomzod qilib ko‘rsatishi aniq. Qolgan partiyalarda nomzodlar aniqmi?”. Ushbu savolga faqat O‘zbekiston Xalq demokratik partiyasi va Ekologik partiya vakillari javob berdi.
“O‘zbekiston Xalq demokratik partiyasida bosh vazir nomzodini taklif etish bo‘yicha zaxira yaratilgan. Ayni vaqtda bosh vazir birinchi o‘rinbosari lavozimida ishlab kelayotgan Ochilboy Ramatov 1991-yildan beri partiyamiz a’zosi, O‘zbekiston Qahramoni, necha yillardan beri bosh vazir o‘rinbosari hisoblanadi. Zaxiraga shu kishining nomzodini qo‘yganmiz”, — dedi O‘zXDP raisining Tashkiliy-nazorat va kadrlar bilan ishlash masalalari bo‘yicha o‘rinbosari Ulug‘bek Vafoyev.
Oliy Majlis deputati, Qonunchilik palatasining Ekologiya va atrof-muhitni muhofaza qilish masalalari qo‘mitasi a’zosi Islom Xushvaqtov esa savolga shunday deb javob berdi: “O‘zbekiston Ekologik partiyasi saylovlarda yuqori o‘rinlarni egallasa, 20 dan ortiq a’zolarimiz borki, ular vazir, qo‘mita raislari sifatida ishlamoqda — ularning har biri bosh vazir lavozimini egallashga tayyor”.
Ma’lumot uchun, 2016-yil 14-dekabridan beri Abdulla Aripov O‘zbekiston bosh vaziri hisoblanadi — uning nomzodi O‘zLiDePning 2016-yil 12-dekabr kuni bo‘lib o‘tgan qurultoyida bosh vazirlikka nomzod sifatida ko‘rsatilgan va Oliy Majlis palatalarining 14-dekabr kuni o‘tkazilgan qo‘shma majlisida tasdiqlangan.
57 yoshli Ochilboy Ramatov 2016-yil dekabridan beri O‘zbekiston bosh vaziri birinchi o‘rinbosari, 2019-yil fevralidan beri O‘zbekiston transport vaziri hisoblanadi. 2013-yili mamlakatning eng oliy mukofoti — O‘zbekiston Qahramoni unvoni bilan taqdirlangan.
O‘zbekistonda parlament saylovlari 2019-yil 22-dekabrga belgilangan.
Izoh (0)