Унда журналистлар тадбирга йиғилган беш партия вакилларига шундай савол билан мурожаат қилди: «ЎзЛиДеП сайловларда ғалаба қозонса, бош вазир лавозимига кимни номзод қилиб кўрсатиши аниқ. Қолган партияларда номзодлар аниқми?». Ушбу саволга фақат Ўзбекистон Халқ демократик партияси ва Экологик партия вакиллари жавоб берди.
«Ўзбекистон Халқ демократик партиясида бош вазир номзодини таклиф этиш бўйича захира яратилган. Айни вақтда бош вазир биринчи ўринбосари лавозимида ишлаб келаётган Очилбой Раматов 1991 йилдан бери партиямиз аъзоси, Ўзбекистон Қаҳрамони, неча йиллардан бери бош вазир ўринбосари ҳисобланади. Захирага шу кишининг номзодини қўйганмиз», — деди ЎзХДП раисининг Ташкилий-назорат ва кадрлар билан ишлаш масалалари бўйича ўринбосари Улуғбек Вафоев.
Олий Мажлис депутати, Қонунчилик палатасининг Экология ва атроф-муҳитни муҳофаза қилиш масалалари қўмитаси аъзоси Ислом Хушвақтов эса саволга шундай деб жавоб берди: «Ўзбекистон Экологик партияси сайловларда юқори ўринларни эгалласа, 20 дан ортиқ аъзоларимиз борки, улар вазир, қўмита раислари сифатида ишламоқда — уларнинг ҳар бири бош вазир лавозимини эгаллашга тайёр».
Маълумот учун, 2016 йил 14 декабридан бери Абдулла Арипов Ўзбекистон бош вазири ҳисобланади — унинг номзоди ЎзЛиДеПнинг 2016 йил 12 декабрь куни бўлиб ўтган қурултойида бош вазирликка номзод сифатида кўрсатилган ва Олий Мажлис палаталарининг 14 декабрь куни ўтказилган қўшма мажлисида тасдиқланган.
57 ёшли Очилбой Раматов 2016 йил декабридан бери Ўзбекистон бош вазири биринчи ўринбосари, 2019 йил февралидан бери Ўзбекистон транспорт вазири ҳисобланади. 2013 йили мамлакатнинг энг олий мукофоти — Ўзбекистон Қаҳрамони унвони билан тақдирланган.
Ўзбекистонда парламент сайловлари 2019 йил 22 декабрга белгиланган.
Изоҳ (0)