AQSh qishloq xo‘jaligi vazirligi o‘rmon xizmati vakili Endryu Rid Parkent tumanidagi So‘qoq dam olish maskanida o‘tkazilgan o‘rmon turizmini rivojlantirish istiqbollariga bag‘ishlangan seminarda o‘rmon sayyohligini rivojlantirish bo‘yicha o‘z maslahatlari bilan bo‘lishdi, deb xabar beradi O‘zA.
Seminarda ishtirok etgan Toshkent viloyati Turizmni rivojlantirish departamenti vakillari bu boradagi mavjud dunyo tajribasi bilan yaqindan tanishdi. Shuningdek, o‘rmon xo‘jaliklarida samarali faoliyatni tashkil etish uslublari, qo‘riqlanadigan hududlar atrofida istiqomat qiladigan aholi xatti-harakatlari bilan bog‘liq bo‘lgan dolzarb muammolarning yechimlari xususida ham tajriba almashildi.
Amerika g‘arbidagi to‘rtta milliy o‘rmonda dam olish maskanlari barpo etilgani, o‘rmon hududida dam olish maskani faoliyatini tashkil etish uchun tanlangan joy avtotransport qatnaydigan yo‘ldan kamida besh kilometr uzoqda joylashgan va hududi 50 gektardan kam bo‘lmasligi haqida ma’lumot berildi.
“Michigan universitetining magistratura bosqichida Sharqiy Yevropa va Rossiya hududlari bo‘yicha, yanada aniqroq aytsam aynan Sibir o‘rmonlari mavzusida ilmiy ish yoqlaganman. Sharqiy Afrikada istiqomat qilgan paytlarim va Yevrosiyo mintaqasi bo‘ylab safarim davomida o‘rgangan barcha amaliy bilim va ko‘nikmalarimni o‘zbekistonlik hamkasblarim bilan o‘rtoqlashmoqchiman. Xususan, qo‘riqlanadigan hududlarning boshqaruvi borasida o‘z mulohazalarimni bildirdim. Bu borada hamkorlik qilamiz”, — deydi AQSh xalqaro o‘rmon xizmati dasturining Rossiya, Yevropa va Yevrosiyo bo‘yicha direktori Lara Peterson.
Anjumanda o‘quv guruhi tashkil etilib, zamonaviy ekologik bilimlar borasida ham keng va atroflicha ma’lumotlar berildi.
Izoh (0)