АҚШ қишлоқ хўжалиги вазирлиги ўрмон хизмати вакили Эндрю Рид Паркент туманидаги Сўқоқ дам олиш масканида ўтказилган ўрмон туризмини ривожлантириш истиқболларига бағишланган семинарда ўрмон сайёҳлигини ривожлантириш бўйича ўз маслаҳатлари билан бўлишди, деб хабар беради ЎзА.
Семинарда иштирок этган Тошкент вилояти Туризмни ривожлантириш департаменти вакиллари бу борадаги мавжуд дунё тажрибаси билан яқиндан танишди. Шунингдек, ўрмон хўжаликларида самарали фаолиятни ташкил этиш услублари, қўриқланадиган ҳудудлар атрофида истиқомат қиладиган аҳоли хатти-ҳаракатлари билан боғлиқ бўлган долзарб муаммоларнинг ечимлари хусусида ҳам тажриба алмашилди.
Америка ғарбидаги тўртта миллий ўрмонда дам олиш масканлари барпо этилгани, ўрмон ҳудудида дам олиш маскани фаолиятини ташкил этиш учун танланган жой автотранспорт қатнайдиган йўлдан камида беш километр узоқда жойлашган ва ҳудуди 50 гектардан кам бўлмаслиги ҳақида маълумот берилди.
«Мичиган университетининг магистратура босқичида Шарқий Европа ва Россия ҳудудлари бўйича, янада аниқроқ айтсам айнан Сибир ўрмонлари мавзусида илмий иш ёқлаганман. Шарқий Африкада истиқомат қилган пайтларим ва Евросиё минтақаси бўйлаб сафарим давомида ўрганган барча амалий билим ва кўникмаларимни ўзбекистонлик ҳамкасбларим билан ўртоқлашмоқчиман. Хусусан, қўриқланадиган ҳудудларнинг бошқаруви борасида ўз мулоҳазаларимни билдирдим. Бу борада ҳамкорлик қиламиз», — дейди АҚШ халқаро ўрмон хизмати дастурининг Россия, Европа ва Евросиё бўйича директори Лара Петерсон.
Анжуманда ўқув гуруҳи ташкил этилиб, замонавий экологик билимлар борасида ҳам кенг ва атрофлича маълумотлар берилди.
Изоҳ (0)