2019-yilning yanvar—sentabr oylari davomida Bosh prokuratura huzuridagi Majburiy ijro byurosi Toshkent shahar boshqarmasiga sud hujjatlari va boshqa organlar hujjatlarini ijro etish yo‘nalishi bo‘yicha 9,687 trillion so‘mlik 667 493 ta ijro hujjati kelib tushgan, shundan, 5,779 trillion so‘mlik 383 471 ta ijro hujjatining ijrosi ta’minlangan. Bu haqda Byuroning Toshkent shahar boshqarmasi “Daryo”ga ma’lum qildi.

Shuningdek, boshqarma va hududiy tuman bo‘limlarida 27 mingdan ortiq aliment undiruvi bilan bog‘lik ijro hujjati mavjud bo‘lib, joriy yilning to‘qqiz oyi mobaynida 324 nafar qarzdorga nisbatan ma’muriy javobgarlik masalasi ko‘rilgan. 20 nafar alimentchi otalarga nisbatan O‘zbekiston Respublikasi Jinoyat Kodeksining 122-moddasiga asosan, jinoyat ishlari qo‘zg‘atilgan.

Aliment pullarini to‘lamasdan yashirinib yurgan 168 nafar qarzdor qidirib topilgan va ulardan aliment pullari undirib berilgan. 65 nafar qarzdorga nisbatan qidiruv ishlari davom ettirilmoqda.

Aliment to‘lovi bo‘yicha qarzdor shaxslar bilan o‘tkazilgan profilaktika va tushuntirish ishlari natijasida 229 ta oila yarashtirilgan.

Boshqarma va uning tuman bo‘limlari tomonidan iste’molchilardan energiya resurslari va suv ta’minoti bo‘yicha joriy yilning to‘qqiz oyi davomida 3,145 trillion so‘m undirilgan. Undiruv o‘tgan yilning shu davriga nisbatan 1,381 trillion so‘mga oshgan.

Xabar berilishicha, 2017-yilning iyul oyidan shu kunga qadar 17 335 nafar iste’molchiga nisbatan 28,2 milliard so‘mlik noreal qarzdorlik aniqlanib, ular olib tashlangan.