Ижтимоий тармоқларда Бухоро вилояти ҳокимлиги ахборот хизмати Шофиркон туманида қутурган итлар қўйларни бўғизлаб кетаётгани тўғрисидаги хабарларга ойдинлик киритиш мақсадида олиб борилган ўрганиш якунлари юзасидан маълумот берди.
Унга кўра, вилоят ветеринария ва чорвачиликни ривожлантириш бошқармаси, ИИБ ППХ ва ЖТСБ карантин бўлинмаси, Шофиркон туман ветеринария ва чорвачиликни ривожлантириш бўлими, туман ДСЭНМ, туман ободонлаштириш бўлими мутасаддиларидан иборат ишчи гуруҳи тузилиб, ҳолат батафсил ўрганилган.
Аниқланишича, жорий йилнинг 17—19 октябрь кунлари кечки пайтда «Ғуломте» маҳалласида яшовчи фуқаро Ато Фаттоевнинг икки бош қўйини дайди итлар ғажиб кетган.
Фуқаронинг қўлбола қўраси у истиқомат қилаётган уйидан тахминан 30 метрлар чамаси узоқроқда жойлашган бўлиб, унда 11 бош майда шохли чорва моли сақланган.
Ўрганиш жараёнида ветеринария мутахассислари фуқаро Ато Фаттоевнинг уч бош йирик шохли ва 9 бош майда шохли чорвасини ҳамда атрофдаги барча хонадонларда парваришланаётган чорва молларини кўрикдан ўтказди. Ҳозирда мавжуд қорамол ва қўйлар соғлом ва зарар етмаганлиги аниқланди. Шундан сўнг туман ободонлаштириш бошқармасининг дайди итларни йўқотиш гуруҳи тадбир ўтказди.
«Уч нафар мутахассисимиз дайди итларни йўқ қилиш билан шуғулланади. Махсус тадбир жойлардан тушадиган мурожаатлар ёки йиллик режага биноан доимий олиб борилади. Масалан, йил бошидан шу кунгача ходимларимиз томонидан 1554 та дайди ит ва мушук аниқланиб, белгиланган тартибда йўқ қилингани фикримиз исботи. Аҳоли ўртасида кенг тушунтириш ишлари олиб борилмоқда. Дайди итлар ён-атрофда ҳалиям борлигига шубҳамиз йўқ. Бу борада тегишли чораларни кўрамиз», — дейди туман ободонлаштириш бўлими бошлиғи Ҳ.Якубов.
Ато Фаттоев қарамоғидаги чорва молларини суғурталамаганлиги ва ўзининг лоқайдлиги сабабли моддий зарар қоплаб берилмайди.
Изоҳ (0)