Rossiyaning Lipetsk shahri sudi er-xotinni shafqatsizlik bilan o‘ldirishda ayblangan o‘zbekistonlik erkakni 18 yil-u 3 oyga ozodlikdan mahrum qildi. Jazoni qattiq tartibli koloniyada o‘tash belgilandi. Bu haqda “Interfaks” xabar berdi.
Sud materiallariga ko‘ra, 2018-yilning 24-sentabr kuni kechasi sudlanuvchi Lipetsk shahridagi o‘z uyida uning mehmoni bo‘lgan 38 yoshli erkak va uning 36 yoshli rafiqasini o‘ldirgan.
Tergov tomonidan isbotlanishicha, erkak jinoyatni o‘ta shafqatsizlik bilan amalga oshirgan. Ta’kidlanishicha, qotillikdan so‘ng erkak o‘z qurbonlarining tanalarini bo‘laklarga bo‘lgan va ularni polietilen paketlarga o‘rab, uy ostidagi yerto‘laga yashirib qo‘ygan.
Uzoq vaqt aloqaga chiqmagan er-xotinning yo‘qolgani haqida ularning qarindoshlari huquqni muhofaza qiluvchi idoralarga xabar bergan. Ularning qo‘shnisi shubha ostiga tushgan. Shu sababli, erkak huquqni muhofaza qiluvchi idoralardan yashiringan va u qidiruvga berilgan.
Er-xotin yo‘qolgan kunda bo‘lgan uy tintuv qilinganda, u yerdan ularning tana bo‘laklari topilgan.
Ayblanuvchi o‘z ish beruvchisiga tegishli garajlardan birida qo‘lga olingan. Erkak u yerda o‘z joniga qasd qilmoqchi bo‘lgan. Tibbiy yordam ko‘rsatilgach, erkak qo‘lga olingan.
Xabar berilishicha, ismi va familiyasi Rustam Ergashev bo‘lgan erkak o‘z aybini tan olmagan. Erkak uning uyidagi yerto‘lada bo‘lgan murdalar haqida hech narsa bilmasligini aytgan. U Lipetskda 11 yil yashagan, qo‘lga olinguniga qadar shaxsiy yuklarni tashish bilan shug‘ullangan.
Izoh (0)