Erdo‘g‘on Trampning “butun dunyoga o‘z yukini tashlamaslik”ni so‘rab yozgan xatini tashlab yuborgan

Turkiya prezidenti Rajab Toyyib Erdo‘g‘on AQSh davlat rahbari Donald Tramp 9-oktabrda “butun dunyoga o‘z yukini tashlamaslik” va Suriyada kurdlarga qarshi urush harakatlarini boshlamaslikni so‘rab yozgan xatini tashlab yuborgan. Bu haqda Meduza xabar berdi.

Turkiya hukumatining vakillari Erdo‘g‘onning ushbu xatga javob yozishni qat’iyan rad etganligini bildirgan. Avval AQSh prezidenti Donald Tramp “Tinchlik bulog‘i” operatsiyasi boshlanishi oldidan Turkiya yetakchisi Rajab Toyyib Erdo‘g‘onga kurdlar generali Mazlum Abdining Anqara bilan muzokaralar olib borishga tayyor ekanligi haqida xat yuborgani xabar qilingandi.

AQSh 15-oktabr, seshanba kuni Turkiyaga qarshi sanksiyalar qo‘llanilganini e’lon qilgan. Cheklov choralari turklarning energetika, mudofaa vazirliklari va bir nechta yuqori lavozimdagi rahbarlariga qarshi qo‘llanilgan. Shuningdek, Vashington turk po‘lati uchun yig‘imlarni 50 foizga oshirmoqchi, keyinchalik moliya hamda vizalar berilishi borasida ham taqiqlar amalga oshirilishi mumkin.

Turkiyaning Suriya hududida o‘tkazayotgan “Tinchlik bulog‘i” operatsiyasini Yevropa ittifoqi, Arab davlatlari ligasi, AQSh, Buyuk Britaniya, Germaniya, Fransiya, Belgiya, Estoniya, Eron va boshqa davlatlar keskin qoralagan. Ayni vaqtda Suriya hududida Turkiya, kurdlar hamda mamlakat hukumatiga qarashli qo‘shinlar o‘zaro urush olib bormoqda. Dunyo davlatlarining ko‘pchiligi ushbu harakatlar sabab Suriyadagi vaziyat yanada beqarorlashishi va IShID qayta tug‘ilishi mumkinligidan xavotirda ekanligini bildirgan. Fransiya, Germaniya hamda Kanada ushbu harbiy harakatlar sabab Turkiyaga qurol sotishni to‘xtatgan.