IIV jamoatchilik va OAV bilan aloqalar boshqarmasi tashabbusi bilan 17-oktabr, payshanba kuni Axborot va ommaviy kommunikatsiyalar agentligida matbuot anjumani o‘tkazildi.
Huquqshunos va bloger Xushnudbek Xudoyberdiyevning ma’lum qilishicha, unda propiska masalasiga ham to‘xtalib o‘tildi.
Xususan, kecha Markaziy bank qarori bilan fuqarolar doimiy propiskasidan qat’i nazar istalgan hududdan kredit olishi mumkin bo‘lganligi yodga olinib, xuddi shu kabi fuqarolarga pasport yoki haydovchilik guvohnomasini ham istalgan hududdan olish imkoniyati yaratilishi ehtimoli haqida so‘raldi. Shunda masalan, Toshkent shahrida yashaydigan fuqaro viloyatga borishga majbur bo‘lmasligi aytildi.
IIV Migratsiya va fuqarolikni rasmiylashtirish Bosh boshqarmasi boshlig‘ining birinchi o‘rinbosari Nodir Ziyoyev bunga quyidagicha javob bergan:
“Bu masala juda o‘rinli va bizning kun tartibimizda bor. Hozirda ushbu tizimni joriy etish bo‘yicha tegishli ishlarni amalga oshiryapmiz. Tez orada pasportni nafaqat doimiy propiskaga qo‘yilgan hududdan, balki vaqtincha ro‘yxatdan o‘tgan hududdan ham olish imkoniyatini yaratish bo‘yicha takliflar kiritiladi”.
“Propiska rejimi nima uchun kerak? Agar xavfsizlik uchun deyilsa, unda nahotki Vatanimiz ichki tinchligining eng katta ustuni va garovi bo‘lgan ichki ishlar organlari mana shu Konstitutsiyaga zid bo‘lgan propiska tartibisiz xavfsizlikni ta’minlay olmaydimi?” degan savolga Nodir Ziyoyev “Biz ijrochimiz. Shunaqa qonun qabul qilingan, biz shuni ijro etamiz xolos”, deya javob bergan.
Izoh (0)