O‘zbekiston Prezidenti Shavkat Mirziyoyev 16-oktabr kuni chorvachilik va bog‘dorchilik tarmoqlarini rivojlantirish bo‘yicha ustuvor vazifalarga bag‘ishlangan yig‘ilish o‘tkazdi.
Yig‘ilishda, jumladan, yer egalarining yerdan qanchalik unumli foydalanayotgani, shuningdek, yaylov yerlari samaradorligi masalalariga ham to‘xtalib o‘tilgan. Bu haqda “Davyergeodezkadastr” davlat qo‘mitasi raisi Abdushukur Abdullayev “Axborot 24” informatsion dasturiga bergan intervyusida ma’lum qildi.
“O‘zbekistonda 21 million gektar yaylov yerlari bor. Hozirda shuning 18,5 million gektaridan qishloq xo‘jaligi maqsadlarida foydalanilmoqda. Bu yerlar chorvaga berilgan-u, lekin undan tartibsiz foydalanilgan”, — dedi Abdushukur Abdullayev.
Uning qo‘shimcha qilishicha, yig‘ilishda boshqa vazirlik va idoralar bilan birgalikda yaylovlardan foydalanish bo‘yicha chora-tadbirlar rejasi ishlab chiqish topshirig‘i berilgan.
“Yaylovlarning uch mavsumli, ikki mavsumli turlari bor. Agar ulardan mavsumiga qarab to‘g‘ri foydalansak, ayirboshlash, o‘rin almashish degan usullari bor, shularni qo‘llab chorvani boqadigan bo‘lsak, bu yerlar kelgusi avlodlarimizni ham boqadi”, — dedi “Davyergeodezkadastr” raisi.
Mavzuga doir: Shavkat Mirziyoyev chorvachilikni sanoat usulida rivojlantirishga ko‘proq e’tibor qaratish bo‘yicha topshiriq berdi
“Bugungi kunda chorvachilikda ozuqaga bo‘lgan ehtiyoj faqatgina 30—35 foizga qondiriladi. Xususan, parrandachilikda ozuqaning 85 foizi import hisobiga ta’minlanadi”, — deya ma’umot bergandi davlat rahbarining matbuot xizmati.
Izoh (0)