Prezident Shavkat Mirziyoyev raisligida 16-oktabr kuni O‘zbekistonda chorvachilik va bog‘dorchilik tarmoqlarini rivojlantirish bo‘yicha ustuvor vazifalarga bag‘ishlangan yig‘ilish o‘tkazildi. Yig‘ilishda, xususan, Veterinariya va chorvachilikni rivojlantirish davlat qo‘mitasi raisi Bahromjon Norqobilov ham qatnashgan.
Tadbirdan so‘ng “O‘zbekiston 24” telekanalining “Axborot 24” informatsion dasturiga intervyu bergan Norqobilovning so‘zlariga ko‘ra, yig‘ilishda Prezident Shavkat Mirziyoyev chorvachilik sohasini rivojlantirish, chorvachilik mahsulotlarini ishlab chiqarish hajmini ko‘paytirish bo‘yicha aniq topshiriq va vazifalarni belgilab bergan.
“Prezident tomonidan sanoat usulida chorvachilikni, ayniqsa, go‘sht yo‘nalishidagi bo‘rdoqichilik korxonalarini ko‘paytirishga ko‘proq e’tibor berish bo‘yicha aniq topshiriqlar berildi. Bu borada qo‘mitamiz 2019-yil oxirigacha kamida 500 bosh chorvaga mo‘ljallangan, bo‘rdoqichilik yo‘nalishidagi 80 ta kompleksni, sutchilik yo‘nalishida esa 70 dan ziyod majmuani ishga tushiradi”, — dedi Bahromjon Norqobilov.
Uning ta’kidlashicha, 2020-yilda bo‘rdoqichilik bo‘yicha yana 150 ta, sutchilik yo‘nalishida esa 140 ta zamonaviy majmualar quriladi. Prezident matbuot xizmati axborotiga ko‘ra, Shavkat Mirziyoyev mutasaddilarga 2019—2021-yillarda 300—500 bosh chorva boqishga mo‘ljallangan 270 ta bo‘rdoqichilik kompleksi va 260 ta sutchilik korxonasini tashkil etish ishlarini jadallashtirish bo‘yicha topshiriq bergan.
“Majmualarni ishga tushirib, mahsulot ishlab chiqarib, aholi dasturxoniga sifati kafolatlangan arzon go‘sht va sut yetkazib berish bo‘yicha topshiriqlar berildi”, — deya qo‘shimcha qildi Veterinariya va chorvachilikni rivojlantirish davlat qo‘mitasi raisi Bahromjon Norqobilov.
Fermer, dehqon xo‘jaliklari va tomorqa yer egalari kengashi raisi Aktam Hayitovning O‘zbekistonda go‘sht narxi oshishiga aholining “ko‘p go‘sht yeyayotgani” sabab ekani haqidagi ta’kidi shov-shuvlarga sabab bo‘lgandi. Hayitovning bu gaplariga javoban e’lon qilingan munosabatlarning birida O‘zbekistonda go‘sht hamon “ibtidoiy natural xo‘jalik muhitida” tayyorlanayotgani, mahsulot tannarxi pasayishi uchun u natural ishlab chiqarishdan sanoat ishlab chiqarishiga o‘tishi kerakligi uqtirilgan edi.
