Ўзбекистон Президенти Шавкат Мирзиёев 16 октябрь куни чорвачилик ва боғдорчилик тармоқларини ривожлантириш бўйича устувор вазифаларга бағишланган йиғилиш ўтказди.
Йиғилишда, жумладан, ер эгаларининг ердан қанчалик унумли фойдаланаётгани, шунингдек, яйлов ерлари самарадорлиги масалаларига ҳам тўхталиб ўтилган. Бу ҳақда «Давергеодезкадастр» давлат қўмитаси раиси Абдушукур Абдуллаев «Ахборот 24» информацион дастурига берган интервьюсида маълум қилди.
«Ўзбекистонда 21 миллион гектар яйлов ерлари бор. Ҳозирда шунинг 18,5 миллион гектаридан қишлоқ хўжалиги мақсадларида фойдаланилмоқда. Бу ерлар чорвага берилган-у, лекин ундан тартибсиз фойдаланилган», — деди Абдушукур Абдуллаев.
Унинг қўшимча қилишича, йиғилишда бошқа вазирлик ва идоралар билан биргаликда яйловлардан фойдаланиш бўйича чора-тадбирлар режаси ишлаб чиқиш топшириғи берилган.
«Яйловларнинг уч мавсумли, икки мавсумли турлари бор. Агар улардан мавсумига қараб тўғри фойдалансак, айирбошлаш, ўрин алмашиш деган усуллари бор, шуларни қўллаб чорвани боқадиган бўлсак, бу ерлар келгуси авлодларимизни ҳам боқади», — деди «Давергеодезкадастр» раиси.
Мавзуга доир: Шавкат Мирзиёев чорвачиликни саноат усулида ривожлантиришга кўпроқ эътибор қаратиш бўйича топшириқ берди
«Бугунги кунда чорвачиликда озуқага бўлган эҳтиёж фақатгина 30—35 фоизга қондирилади. Хусусан, паррандачиликда озуқанинг 85 фоизи импорт ҳисобига таъминланади», — дея маъумот берганди давлат раҳбарининг матбуот хизмати.
Изоҳ (0)