“Toshkent” xalqaro aeroporti bojxonachilari “yashil” yo‘lak orqali 213 gramm quyma tillalarni og‘ziga solib, xorijga uchmoqchi bo‘lgan shaxsni qo‘lga oldi. Bu haqda Davlat bojxona qo‘mitasi matbuot xizmati xabar berdi.
Bojxonachilar “yashil” yo‘lak orqali harakatlangan fuqaro M.A.ning xatti-harakatlaridan shubhalanib, uni kuzatgan.
Shundan so‘ng ushbu fuqaro zamonaviy skaner qurilmasi yordamida xolislar ishtirokida tekshiruvdan o‘tkazilganda uning qing‘ir rejasi fosh etilgan. U o‘z og‘iz bo‘shlig‘iga umumiy vazni 213 grammni tashkil etuvchi 2 dona quyma tilla bo‘laklarini solib, xorijga uchib ketishni rejalashtirgani ma’lum bo‘ldi.
Qonunbuzardan umumiy qiymati 70 million so‘mdan ortiqni tashkil etuvchi quyma tilla bo‘laklari ashyoviy dalil sifatida olingan.
Hozirda holat yuzasidan bojxona organlari tomonidan surishtiruv harakatlari davom ettirilmoqda.
Izoh (0)