“YPX xodimi emas, balki haydovchilar o‘zaro kelisha olmay urushib qolgan”. IIV Telegram’da tarqalgan videoga munosabat bildirdi

Ichki ishlar vazirligi Axborot xizmati 14-oktabr kuni Telegram’da tarqalgan “YPX xodimi bilan janjal” nomli videolavha yuzasidan munosabat bildirdi.

Toshkent shahar Ichki ishlar bosh boshqarmasining ma’lumotiga ko‘ra, videolavhada aks etgan holat shu yilning 20-may kuni soat 13:30 larda poytaxtning Abay—Alisher Navoiy ko‘chalari kesishgan chorrahada yuz bergan. Voqea sodir bo‘lgan joyda yo‘l-patrul xizmati xodimi hech kim bilan janjallashmagan. Aksincha, Spark rusumli avtomashina haydovchisi va u bilan birga bo‘lgan o‘rtog‘i Matiz rusumli avtomashina haydovchisi bilan o‘zaro kelisha olmay, bir-birlarini uyatli so‘zlar bilan haqoratlab, jamoat joyida mushtlashgan.

“Mazkur uch nafar fuqaroga nisbatan Ma’muriy javobgarlik to‘g‘risidagi kodeksning 183-moddasiga muvofiq bayonomalar rasmiylashtirilib, qonuniy chora ko‘rish uchun Shayxontohur tumani ma’muriy sudiga yuborilgan”, — deyiladi xabarda.

18-iyun kuni Shayxontohur tumani ma’muriy sudi A.A., Sh.X. va B.X.larni Ma’muriy javobgarlik to‘g‘risidagi kodeksning 183-moddasida (“Mayda bezorilik”) nazarda tutilgan huquqbuzarlikni sodir etganlikda aybli deb topib, ularning har biriga nisbatan eng kam ish haqining 3 baravari miqdorida jarima jazosi tayinlagan.