«Тошкент» халқаро аэропорти божхоначилари «яшил» йўлак орқали 213 грамм қуйма тиллаларни оғзига солиб, хорижга учмоқчи бўлган шахсни қўлга олди. Бу ҳақда Давлат божхона қўмитаси матбуот хизмати хабар берди.
Божхоначилар «яшил» йўлак орқали ҳаракатланган фуқаро М.А.нинг хатти-ҳаракатларидан шубҳаланиб, уни кузатган.
Шундан сўнг ушбу фуқаро замонавий сканер қурилмаси ёрдамида холислар иштирокида текширувдан ўтказилганда унинг қинғир режаси фош этилган. У ўз оғиз бўшлиғига умумий вазни 213 граммни ташкил этувчи 2 дона қуйма тилла бўлакларини солиб, хорижга учиб кетишни режалаштиргани маълум бўлди.
Қонунбузардан умумий қиймати 70 миллион сўмдан ортиқни ташкил этувчи қуйма тилла бўлаклари ашёвий далил сифатида олинган.
Ҳозирда ҳолат юзасидан божхона органлари томонидан суриштирув ҳаракатлари давом эттирилмоқда.
Изоҳ (0)