Тошкент вилоятидаги Textile Technologies Group корхонасига қарашли Чиноз пахта тўқимачилик ишлаб чиқариш кластери майдонида илк бор органик пахта етиштирилди, деб хабар бермоқда ЎзА.
«Ҳозир Чиноз туманининг 217 гектар майдонида илк бор органик пахта етиштирилди. Органик пахта парвариши учун кимёвий ва минерал ўғитлар ишлатилмай, аксинча, биомаҳсулотлар ишлатилди. Кутилган натижа эса аъло даражада. Ҳосилдорлик ҳам юқори, ҳар бир гектаридан 30 центнердан ҳосил олинмоқда», — деган Чиноз пахта тўқимачилик ишлаб чиқариш кластери мутахассиси Турсунбой Комилов.
Етиштирилган органик пахтанинг сифат даражасини аниқлаш мақсадида Болгариядан келган Control union ташкилоти инспектор-аудитори Екатерина Томева маҳсулотга юқори баҳо берган. Унинг фикрича, маҳсулотдан нафақат олий навли тола, балки чигитидан экологик тоза пахта ёғи олиш мумкин. Маҳсулот жаҳон ва Европа бозорида сифати бўйича бозордаги нархи бир ярим баробар қўшимча қийматга эга.
Шунингдек, 8 октябрь куни Чинозда етиштирилган органик пахта халқаро экологик талабларга тўлиқ жавоб бериши тўғрисидаги сертификатга эга бўлди. Энди маҳсулотни жаҳон ва Европа бозорига экспорт қилиш мумкин.
Маълумот учун, Textile Technologies Group МЧЖ шаклидаги хорижий корхона 2010 йилда ташкил этилган бўлиб, у 2013 йилдан бошлаб ўз ишлаб чиқариш фаолиятини бошлаган. Асосий фаолияти калава ип ишлаб чиқаришга ихтисослашган. Корхонанинг йиллик қуввати 5400 тоннани ташкил этади. Корхонада ишлаб чиқарилган маҳсулотлар Хитой, Туркия, Эрон, Корея давлатларига, шунингдек, Россия, Беларусь ва Қирғизистонга экспорт қилинади.
Изоҳ (0)