Surxondaryo viloyatining Angor tumanidagi 19-umumta’lim maktabida sinf xonalari yetishmasligi sababli darslar 4-smena o‘tilayotgani haqida “Daryo” muxbiri Nargiza Rahmatullayeva tomonidan xabar berilgan edi.
Angor tumani Xalq ta’limi bo‘limi mazkur xabarga o‘z munosabatini bildirdi.
Raddiyada aytilishicha, “Daryo” muxbiri tomonidan berilgan xabar tafsilotlari mutaxassislar tomonidan o‘rganib chiqilgan va jurnalistning bergan ma’lumoti o‘z tasdig‘ini topmagan.
Maktab haqiqatan ham 1994-yil qurilgan. Binoning quvvati 320 o‘rinli bo‘lib, hozirgi kunda 28 ta sinfda 576 nafar o‘quvchi ta’lim-tarbiya olmoqda. Maktab 2019-yilda mahalliy budjet hisobidan 859 million so‘mga kapital ta’mirlandi, deyiladi XTB raddiyasida.
Tuman XTB tomonidan ta’kidlanishicha, maktabning o‘quv-tarbiya ishlari bo‘yicha direktor o‘rinbosari G‘ulom Xursanov “Daryo” jurnalisti bilan bo‘lgan suhbatda “Maktabimizda 4 smenada darslar o‘tiladi”, — degan ma’lumotni bermaganligi ma’lum bo‘lgan.
Maktabning quvvatidan kelib chiqib, agar zarurat tug‘ilsa, 640 nafar o‘quvchini to‘liq ikki navbatda qabul qilish imkoniyati mavjud bo‘lgan holda jurnalist Nargiza Rahmatullayeva qanday manbaga asoslanib, 4 smenada o‘qitilyapti degan ma’lumot berganligi noaniq bo‘lib qolmoqda, deyiladi raddiyada.
Qayd etilishicha, maktab binosida jami 19 ta xona mavjud bo‘lib, shulardan 13 tasi sinfxona hisoblanadi. O‘quv yili boshida bitta sinfga xona yetishmovchiligi hamda jihozlar to‘liq yetib kelmaganligi sababli faqatgina ikkita (4 “A” va “B”) sinf 3 smenada o‘qitilgan. Hozirgi kunda maktabdagi o‘qituvchilar uchun ajratilgan xona ma’naviy-ma’rifiy ishlar bo‘yicha direktor o‘rinbosari xonasiga ko‘chirildi va sinflar to‘liq 2 smenaga joylashtirildi. Hozir darslar to‘liq 2 smenada o‘qitilmoqda.
XTB tomonidan qayd etilishicha, tuman xalq ta’limi bo‘limi mudiri N.Mamadiyorovning 19-sonli umumta’lim maktabining o‘quvchilari 4 navbatda o‘qiyotganligi haqida mutlaqo ma’lumot bermaganligi aniqlangan.
Biroq “Daryo” ixtiyorida darslarning to‘rt smenada tashkil etilganligiga xona yetishmasligi sabab bo‘lgani haqidagi audioyozuv bor.
“Daryo” jurnalistining maktab direktori o‘rinbosari G‘ulom Xursanov bilan suhbati audioyozuvida direktor o‘rinbosari yana 180 o‘rinli qo‘shimcha bino bo‘lsa, o‘quvchilar to‘liq ikki smenaga joylashishini aytgan. G‘ulom Xursanov soat 13:05 da boshlanadigan smenaga sinfxonalarni bo‘shatib berish kerakligi sababli o‘rta smenadagi jismoniy tarbiya, atrofimizdagi olam va texnologiya darslari tashqarida o‘tilayotganini ta’kidlagan.
Maqolada “Bir vaqtning o‘zida jismoniy tarbiya darsi bitta o‘qituvchi tomonidan ikkita sinfga o‘tilayotgan ekan” degan jumla keltirilgan. Jismoniy tarbiya o‘qituvchisi Xolmamat To‘xtayev “Sharoit yo‘qligidan bir vaqtning o‘zida 2 “D” va 2 “V” sinflarida jismoniy tarbiya darsini o‘tayapman” degan izohni bergan. Ushbu sinflarga darslar ikki smenada o‘tilgan. Dars jadvalining yo‘riqnoma asosida tuzilishiga ko‘ra, jismoniy tarbiya darsi oxirgi soatlarga qo‘yilgan. Sinfxonalarni uchinchi smenada o‘qiyotgan 3-sinfga bo‘shatib berish lozim bo‘lgan. Hozirgi vaqtda dars jadvali bo‘yicha parallel darslar mavjud emas. O‘qituvchilarning dars berishlari uchun sharoitlar yaratilgan, deyiladi raddiyada.
Izoh (0)