Toshkentda yo‘lovchilarga qo‘pol muomala qilgan YPX inspektoriga chora ko‘rildi

Toshkentda YPX xodimlari tomonidan to‘xtatilgan Lacetti avtomobili yo‘lovchilariga qo‘pol muomalada bo‘lgan (video) poytaxt transport boshqarmasi inspektoriga nisbatan chora ko‘rildi. Bu haqda Transport vazirligi matbuot xizmati xabar berdi.

Ijtimoiy tarmoqlarda Trasport vazirligi inspektorining xizmat vazifasini bajarish vaqtida o‘z vakolatini suiiste’mol qilganligi aks etgan videotasvirlar tarqalib, muhokamalarga sabab bo‘lgan.

Mazkur holatga oydinlik kiritish maqsadida maxsus ishchi guruhi tuzilib xizmat tekshiruvi o‘tkazilgan. O‘rganishlarda aniqlanishicha, 7-oktabr, dushanba kuni Toshkentning Bektemir tumani TXAY ko‘chasida noqonuniy yo‘lovchi tashish faoliyati bilan shug‘ullanib kelayotgan shaxslarni aniqlashga qaratilgan qo‘shma reyd tadbiri davomida YPX noziri tomonidan Lacetti mashinasi to‘xtatilgan.

Toshkent transport boshqarmasining avtomobil tashuvlari xavfsizligini ta’minlashni nazorat qilish bo‘limi 1-toifali inspektori A.Hoshimov transport vositasida Farg‘ona viloyatiga ketayotgan yo‘lovchilar bilan olib borgan suhbati davomida yo‘lovchi talabiga ko‘ra shaxsini tasdiqlovchi hujjatni ko‘rsatmay, aksincha, yo‘lovchidan shaxsini tasdiqlovchi hujjatni taqdim etishini talab qilib, qo‘pol tarzda yo‘lovchini so‘roqqa tortgan va transport vositasidan chiqishni talab qilgan.

Qayd etlishicha, ishchi guruhi tomonidan Toshkent transport boshqarmasida o‘tkazilgan tadbirda inspektorlar birinchi navbatda yo‘lovchi tashish faoliyati qonuniyligini, xavfsizligini ta’minlashi hamda yo‘lovchilarning huquqini himoya qilishi lozimligi ta’kidlanib, yuqoridagi kabi axloqsiz holatlarning kelgusida takrorlanishining oldini olish bo‘yicha tushuntirish ishlari olib borildi.

Shuningdek, inspektorlar tomonidan o‘z vakolatini suiiste’mol qilish holatlarining oldini olish maqsadida ularning huquqiy bilimini oshirish, muomala madaniyati bo‘yicha muntazam ravishda yo‘riqnomalar o‘tkazilishi yuzasidan boshqarma rahbariyatiga topshiriq berildi. Yuqorida ro‘y bergan holat yuzasidan 1-toifali inspektor A.Hoshimovga nisbatan xayfsan e’lon qilingan.