Тошкентда ЙПХ ходимлари томонидан тўхтатилган Lacetti автомобили йўловчиларига қўпол муомалада бўлган (видео) пойтахт транспорт бошқармаси инспекторига нисбатан чора кўрилди. Бу ҳақда Транспорт вазирлиги матбуот хизмати хабар берди.
Ижтимоий тармоқларда Траспорт вазирлиги инспекторининг хизмат вазифасини бажариш вақтида ўз ваколатини суиистеъмол қилганлиги акс этган видеотасвирлар тарқалиб, муҳокамаларга сабаб бўлган.
Мазкур ҳолатга ойдинлик киритиш мақсадида махсус ишчи гуруҳи тузилиб хизмат текшируви ўтказилган. Ўрганишларда аниқланишича, 7 октябрь, душанба куни Тошкентнинг Бектемир тумани ТХАЙ кўчасида ноқонуний йўловчи ташиш фаолияти билан шуғулланиб келаётган шахсларни аниқлашга қаратилган қўшма рейд тадбири давомида ЙПХ нозири томонидан Lacetti машинаси тўхтатилган.
Тошкент транспорт бошқармасининг автомобиль ташувлари хавфсизлигини таъминлашни назорат қилиш бўлими 1-тоифали инспектори А.Ҳошимов транспорт воситасида Фарғона вилоятига кетаётган йўловчилар билан олиб борган суҳбати давомида йўловчи талабига кўра шахсини тасдиқловчи ҳужжатни кўрсатмай, аксинча, йўловчидан шахсини тасдиқловчи ҳужжатни тақдим этишини талаб қилиб, қўпол тарзда йўловчини сўроққа тортган ва транспорт воситасидан чиқишни талаб қилган.
Қайд этлишича, ишчи гуруҳи томонидан Тошкент транспорт бошқармасида ўтказилган тадбирда инспекторлар биринчи навбатда йўловчи ташиш фаолияти қонунийлигини, хавфсизлигини таъминлаши ҳамда йўловчиларнинг ҳуқуқини ҳимоя қилиши лозимлиги таъкидланиб, юқоридаги каби ахлоқсиз ҳолатларнинг келгусида такрорланишининг олдини олиш бўйича тушунтириш ишлари олиб борилди.
Шунингдек, инспекторлар томонидан ўз ваколатини суиистеъмол қилиш ҳолатларининг олдини олиш мақсадида уларнинг ҳуқуқий билимини ошириш, муомала маданияти бўйича мунтазам равишда йўриқномалар ўтказилиши юзасидан бошқарма раҳбариятига топшириқ берилди. Юқорида рўй берган ҳолат юзасидан 1-тоифали инспектор А.Ҳошимовга нисбатан хайфсан эълон қилинган.
Изоҳ (0)