“Muammo — mutasaddilarda”. Sirdaryo hokimi G‘ofurjon Mirzayev daraxt kesishga ruxsat beruvchi kadrlar masalasini qayta ko‘rib chiqishni taklif qildi

Daraxtlarning yoshi, turi va qaysi hududda joylashgani bo‘yicha kontur-xaritani Ekologiya va atrof muhitni muhofaza qilish davlat qo‘mitasi tomonidan elektron ko‘rinishda e’lon qilish vaqti keldi. Bu haqda Sirdaryo viloyati hokimi, senator G‘ofurjon Mirzayev “Daryo” muxbiri Musulmonbek Ibrohimovga bergan intervyusida aytib o‘tdi.

G‘ofurjon Mirzayevning ta’kidlashicha, daraxtlarni ruxsatsiz kesish qonunga xilofligini odamlar yaxshi biladi. Bunda asosiy muammo — mutasaddilarda va bu jarayonda daraxt, butazorlarni kesishga ruxsat berayotgan kadrlar masalasini qayta ko‘rib chiqish lozim.

“Senatning 23-yalpi majlisida Ekologiya va atrof muhitni muhofaza qilish davlat qo‘mitasiga takliflarimni berdim. Jumladan, dunyo tajribasini ilmiy ham amaliy jihatlarini o‘zlashtirish lozim. Masalan, rivojlangan mamlakatlarda daraxtlarni maxsus tamg‘alash yo‘lga qo‘yilgan. Tamg‘ada daraxtning yoshi, turi va qachon ro‘yxatga olingani haqida ma’lumotlar aks etadi. Bizda ham ushbu tajribani qo‘llab, daraxtlarning yoshi, turi va qaysi hududda joylashgani bo‘yicha kontur-xaritani qo‘mita tomonidan elektron ko‘rinishda e’lon qilish vaqti keldi. Shundagina biz aniq ma’lumotlarga ega bo‘lamiz va tahlil qila olamiz. Bularning bari keng jamoatchilik nazorati ostida o‘tkazilishi shart”, — dedi hokim.

Sirdaryo viloyati cho‘l hudud bo‘lgani uchun tuproq va shamol eroziyasiga qarshi exotozorlar, tutzorlar bo‘lgan. Keyingi paytlarda yoqilg‘iga bo‘lgan talabning ortishi tufayli daraxtzor va butazorlar kesib ketildi va bu ba’zi joylarda hali ham davom etmoqda. Bunga qarshi qat’iy kurashishimiz va o‘z navbatida odamlarga qulay tanlash imkoniyatini ham berishimiz kerak.

Shuningdek, chetdan daraxtlar olib kelishda albatta hududlar iqlimini ham hisobga olish zarur. Ba’zi daraxtlarni qanchalik parvarishlamaylik, turli kasalliklarga chalinishi ko‘paymoqda.

Ota-bobolarimizdan qolgan bir gap bor: “Bitta daraxt kessang, o‘rniga o‘nta daraxt ek” yoki oilada farzand tug‘ilsa, o‘nlab daraxt ekilgan. Ertaga biror bino qurishi uchun foydalansin, deb. Bu ishlar bejizga qilinmaganini davrning o‘zi ko‘rsatib turibdi.

G‘ofurjon Mirzayev, Sirdaryo viloyati hokimi