Дарахтларнинг ёши, тури ва қайси ҳудудда жойлашгани бўйича контур-харитани Экология ва атроф муҳитни муҳофаза қилиш давлат қўмитаси томонидан электрон кўринишда эълон қилиш вақти келди. Бу ҳақда Сирдарё вилояти ҳокими, сенатор Ғофуржон Мирзаев «Дарё» мухбири Мусулмонбек Иброҳимовга берган интервьюсида айтиб ўтди.
Ғофуржон Мирзаевнинг таъкидлашича, дарахтларни рухсатсиз кесиш қонунга хилофлигини одамлар яхши билади. Бунда асосий муаммо — мутасаддиларда ва бу жараёнда дарахт, бутазорларни кесишга рухсат бераётган кадрлар масаласини қайта кўриб чиқиш лозим.
«Сенатнинг 23-ялпи мажлисида Экология ва атроф муҳитни муҳофаза қилиш давлат қўмитасига таклифларимни бердим. Жумладан, дунё тажрибасини илмий ҳам амалий жиҳатларини ўзлаштириш лозим. Масалан, ривожланган мамлакатларда дарахтларни махсус тамғалаш йўлга қўйилган. Тамғада дарахтнинг ёши, тури ва қачон рўйхатга олингани ҳақида маълумотлар акс этади. Бизда ҳам ушбу тажрибани қўллаб, дарахтларнинг ёши, тури ва қайси ҳудудда жойлашгани бўйича контур-харитани қўмита томонидан электрон кўринишда эълон қилиш вақти келди. Шундагина биз аниқ маълумотларга эга бўламиз ва таҳлил қила оламиз. Буларнинг бари кенг жамоатчилик назорати остида ўтказилиши шарт», — деди ҳоким.
Сирдарё вилояти чўл ҳудуд бўлгани учун тупроқ ва шамол эрозиясига қарши эхотозорлар, тутзорлар бўлган. Кейинги пайтларда ёқилғига бўлган талабнинг ортиши туфайли дарахтзор ва бутазорлар кесиб кетилди ва бу баъзи жойларда ҳали ҳам давом этмоқда. Бунга қарши қатъий курашишимиз ва ўз навбатида одамларга қулай танлаш имкониятини ҳам беришимиз керак.Шунингдек, четдан дарахтлар олиб келишда албатта ҳудудлар иқлимини ҳам ҳисобга олиш зарур. Баъзи дарахтларни қанчалик парваришламайлик, турли касалликларга чалиниши кўпаймоқда.
Ота-боболаримиздан қолган бир гап бор: «Битта дарахт кессанг, ўрнига ўнта дарахт эк» ёки оилада фарзанд туғилса, ўнлаб дарахт экилган. Эртага бирор бино қуриши учун фойдалансин, деб. Бу ишлар бежизга қилинмаганини даврнинг ўзи кўрсатиб турибди.
Ғофуржон Мирзаев, Сирдарё вилояти ҳокими
Изоҳ (0)