Samarqandda yarim kechasi mashinasi buzilib qolgan haydovchini urib, uning 20 qop mayizini o‘g‘irlab ketganlar ushlandi

Samarqand viloyatida 20 qop mayizni o‘g‘irlagan shaxslar qo‘lga olindi, deb xabar bermoqda IIVning “Postda” nashri.

Ma’lum bo‘lishicha, Samarqand viloyatining Qo‘shrabot tumani Oqmachit qishlog‘ida yashovchi N.B. 7-oktabr kuni o‘z boshqaruvidagi Labo mashinaga 20 qop mayizni yuklab, “Navkat” mahalla fuqarolar yig‘ini hududidan o‘tuvchi yo‘lda ketayotganda kutilmaganda mashina to‘xtab qolgan.

Yo‘lda soat 02:30 gacha qolib ketgan haydovchi uzoqdan yaqinlashib kelayotgan Cobalt mashinasi ko‘rib, yordam olish umidida uni to‘xtatgan.

Cobalt’dan tushgan ikki noma’lum shaxs N.B.ning oldiga yaqinlashib, savol berib vaziyatni o‘rgangan bo‘lgan, keyin uning turli joylariga urib ketgan. Talonchilar N.B.ga jiddiy jarohat yetkazib, 20 qop mayizni mashinaga ortib, voqea joyidan yashiringan.

Jabrlanuvchi o‘ziga kelib, tezda bu haqda ichki ishlar organiga murojaat qilgan. Ko‘rilgan choralar natijasida ushbu jinoyatni Qo‘shrabot tumanining Yangiqishloq qishlog‘ida yashovchi E. D. va N. N. sodir etgani aniqlanib, qo‘lga olingan.

Ayni paytda holat yuzasidan jinoyat ishi qo‘zg‘atilib, tergov ishlari davom etmoqda.