Самарқанд шаҳрида 10 октябрь, пайшанба куни иккита мактабгача таълим муассасасининг тарбияланувчилари овқатдан заҳарланиб, вилоят юқумли касалликлар шифохонасига ётқизилган ҳақида хабар берилган эди. Бош прокуратураси мазкур ҳолат юзасидан баёнот берди.
Маълум қилинишича, 2019 йил 11 октябрь куни вилоят юқумли касалликлар шифохонасига шу куни соат 10:00 да шаҳардаги 80, 98 ҳамда 106-сонли мактабгача таълим муассасаларнинг 12 нафар тарбияланувчилари овқатдан заҳарланиш токсикоинфекцияси енгил-ўрта даражаси ташхиси билан ётқизилган.Аниқланишича, тарбияланувчилар қайд этилган мактабгача таълим муассасаларида ош, борш, макарон, салат каби аралаш овқатларни истеъмол қилганлиги натижасида соғлиқлари ёмонлашиб, шифохонага мурожаат қилган.
Шаҳардаги 80, 98 ва 106-мактабгача таълим муассасаларига «Э.М.» корхонаси томонидан аутсорсинг асосида хизмат кўсатиб келинган.
Мазкур заҳарланиш ҳолати юзасидан вилоят ДСЭНМ томонидан 80, 98 ва 106-МТМ фаолияти вақтинча тўхтатилган.
Ҳозирда беморларнинг аҳволи қониқарли бўлиб, даволаш муолажалари давом эттирилмоқда.
Мазкур ҳолат юзасидан Самарқанд шаҳар прокуратураси томонидан Жиноят Кодексининг 257-1-моддаси 1-қисми билан жиноят иши қўзғатилиб, жиноят иши шаҳар ИИБ ҳузуридаги тергов бўлимига юборилган.
Маълумот учун, сўнгги бир ой давомида Ўзбекистонда овқатдан оммавий заҳарланиш ҳолатлари бир неча бор юз берди. Хусусан, 20 сентябрь куни Наманганда ўтказилган тўй маросимида 18 киши, 27 сентябрь куни Бекободдаги 15-мактабгача таълим ташкилотида 15 нафар бола, 30 сентябрь куни Андижондаги хусусий мактабда 82 нафар бола, 8 октябрь куни Андижондаги 35-мактабда 27 киши, хусусан, 24 нафар бола овқатдан заҳарланганиб, касалхонага ётқизилган.
Самарқанд вилоятининг ўзида эса охирги бир ой давомида камида икки марта шундай фавқулодда вазият кузатилди: 14 сентябрь куни бўлиб ўтган тўйдан сўнг 10 дан ортиқ одам шифохонага мурожаат қилган, 6 октябрь куни эса Самарқанд шаҳридаги хот-дог шохобчаларидан бирида овқатланган камида 24 киши эртаси куни касалхонага ётқизилган.
Изоҳ (0)