Joriy yilning 6-martdagi “Transport va turizm obyektlarida jamoat xavfsizligini ta’minlashning samarali tizimini joriy etishga oid qo‘shimcha chora-tadbirlar to‘g‘risida”gi Prezident qaroriga muvofiq Toshkent viloyat IIBB tuzilmasida Xavfsiz turizmni ta’minlash boshqarmasi tashkil etilib, hozirgi kunda faoliyati yo‘lga qo‘yilgan, deb xabar bermoqda viloyat IIBB.
Bevosita turistik hududlarda jamoat xavfsizligini ta’minlash, turistlarning huquq va erkinliklari, qonuniy manfaatlari, hayoti, sog‘lig‘i va mol-mulkini himoya qilish, yuzaga keladigan jinoiy holatlarni tizimli tahlil qilish, ularga nisbatan sodir etilgan huquqbuzarliklar sabablari va sharoitlarini aniqlash hamda ularni bartaraf etish, shuningdek, shartnoma asosida turistlar va turistik guruhlarni kuzatib borish boshqarmaning asosiy vazifalaridan hisoblanadi.
Takidlanishicha, mazkur boshqarmada ikki va undan ortiq xorijiy tillarni biladigan, turistik hududlarning tarixi bo‘yicha hamda zamonaviy axborot-kommunikatsiya texnologiyalari sohasida bilimlarga ega bo‘lgan mutaxassis xodimlar faoliyat olib bormoqda. Shuningdek, ular o‘z xizmat faoliyatini samarali tashkil etishi maqsadida zamonaviy avtomototransport vositalari hamda boshqa zaruriy texnika va jihozlar bilan ta’minlangan.
Jumladan, turizm obyektlari va infratuzilmasi hududlarida huquq-tartibotni ta’minlash maqsadida “Chorvoq” erkin turistik zonasi hududida to‘rtta, Kumushkon qishlog‘i va Zangiota majmuasi hududlarida bittadan, jami olti dona zamonaviy tipdagi xizmat maskanlari o‘rnatilgan.
Ushbu maskanlarda hamda turistik obyektlarda xizmat olib borayotgan xodimlar tomonidan, ularga turli masalalarda murojaat qilgan 554 nafar xorijiy hamda 925 nafar mahalliy turistlarning barchasiga amaliy yordamlar ko‘rsatilgan.
Viloyat hududiga joriy yilning to‘qqiz oyi davomida jami 3,21 million turist tashrif buyurishiga erishildi. Bu ko‘rsatkich o‘tgan yilning shu davriga nisbatan 2,41 millionga yoki 33,2 foizga ko‘paygan. Jumladan, xorijlik turistlar 375 mingdan 600 mingga yoki 60,0 foizga mahalliy turistlar esa 2,035 milliondan 2,61 million kishiga yoki 28,2 foizga o‘sgan.
Joriy yil yakuniga qadar esa, viloyatga tashrif buyuradigan turistlarning soni qariyb 3,8 million nafarga yetishi kutilmoqda.
Izoh (0)