Жорий йилнинг 6 мартдаги «Транспорт ва туризм объектларида жамоат хавфсизлигини таъминлашнинг самарали тизимини жорий этишга оид қўшимча чора-тадбирлар тўғрисида»ги Президент қарорига мувофиқ Тошкент вилоят ИИББ тузилмасида Хавфсиз туризмни таъминлаш бошқармаси ташкил этилиб, ҳозирги кунда фаолияти йўлга қўйилган, деб хабар бермоқда вилоят ИИББ.
Бевосита туристик ҳудудларда жамоат хавфсизлигини таъминлаш, туристларнинг ҳуқуқ ва эркинликлари, қонуний манфаатлари, ҳаёти, соғлиғи ва мол-мулкини ҳимоя қилиш, юзага келадиган жиноий ҳолатларни тизимли таҳлил қилиш, уларга нисбатан содир этилган ҳуқуқбузарликлар сабаблари ва шароитларини аниқлаш ҳамда уларни бартараф этиш, шунингдек, шартнома асосида туристлар ва туристик гуруҳларни кузатиб бориш бошқарманинг асосий вазифаларидан ҳисобланади.
Такидланишича, мазкур бошқармада икки ва ундан ортиқ хорижий тилларни биладиган, туристик ҳудудларнинг тарихи бўйича ҳамда замонавий ахборот-коммуникация технологиялари соҳасида билимларга эга бўлган мутахассис ходимлар фаолият олиб бормоқда. Шунингдек, улар ўз хизмат фаолиятини самарали ташкил этиши мақсадида замонавий автомототранспорт воситалари ҳамда бошқа зарурий техника ва жиҳозлар билан таъминланган.
Жумладан, туризм объектлари ва инфратузилмаси ҳудудларида ҳуқуқ-тартиботни таъминлаш мақсадида «Чорвоқ» эркин туристик зонаси ҳудудида тўртта, Кумушкон қишлоғи ва Зангиота мажмуаси ҳудудларида биттадан, жами олти дона замонавий типдаги хизмат масканлари ўрнатилган.
Ушбу масканларда ҳамда туристик объектларда хизмат олиб бораётган ходимлар томонидан, уларга турли масалаларда мурожаат қилган 554 нафар хорижий ҳамда 925 нафар маҳаллий туристларнинг барчасига амалий ёрдамлар кўрсатилган.
Вилоят ҳудудига жорий йилнинг тўққиз ойи давомида жами 3,21 миллион турист ташриф буюришига эришилди. Бу кўрсаткич ўтган йилнинг шу даврига нисбатан 2,41 миллионга ёки 33,2 фоизга кўпайган. Жумладан, хорижлик туристлар 375 мингдан 600 мингга ёки 60,0 фоизга маҳаллий туристлар эса 2,035 миллиондан 2,61 миллион кишига ёки 28,2 фоизга ўсган.
Жорий йил якунига қадар эса, вилоятга ташриф буюрадиган туристларнинг сони қарийб 3,8 миллион нафарга етиши кутилмоқда.
Изоҳ (0)