Xavfsiz turizmni ta’minlash boshqarmasi Termizdagi xalqaro musobaqaga kelgan bir guruh turistlarning yo‘qolgan buyumlarini topib berdi

Surxondaryo viloyatida 5—6-oktabr kunlari O‘zbekiston Prezidentining sovrini uchun “Al Hakim At-Termiziy” xotirasiga bag‘ishlangan kurash bo‘yicha xalqaro turnirda Surxondaryo viloyatiga jami 46 ta davlatdan 200 nafardan ortiq chet ellik sportchi va mehmonlar tashrif buyurdi. Bu haqda Surxondaryo viloyati IIB matbuot xizmati xabar berdi.

Tashrif davomida xorijlik mehmonlar ehtiyotsizligi oqibatida shaxsiy buyumlarini yo‘qotib qo‘yganligi bo‘yicha Surxondaryo viloyati IIB Xavfsiz turizmni ta’minlash boshqarmasi xodimlariga qilgan murojaatlari, zudlik bilan o‘rganilib, yo‘qotilgan narsa va buyumlar o‘z egalariga qaytarildi.

Xususan, 5-oktabr kuni Afg‘oniston fuqarosi 1991-yilda tug‘ilgan Mubariz Sohrab uyali telefonini yo‘qotib qo‘yganligi bo‘yicha qilgan murojaati yuzasidan uning uyali telefon apparati topib berildi.

Bundan tashqari, 6-oktabr kuni Braziliya fuqarosi 1975-yilda tug‘ilgan Paulo Katsuragi o‘zining sumkasi va uning ichida bo‘lgan fuqarolik pasporti, 2500 AQSh dollari, 300 yevro pul buyumlarini ehtiyotsizligi oqibatida yo‘qotib qo‘yganligi bo‘yicha qilgan murojaati, shuningdek, shu kuni Afg‘onistondan kelgan hakam Ahmat Yamasamak hakamlik sertifakatini yo‘qotib qo‘yganligi bo‘yicha qilgan murojaatlar yuzasidan yo‘qotilgan buyumlar topilib, o‘z egalariga topshirildi.