Sog‘liqni saqlash vazirligi ba’zi hollarda chaqiriq joyiga “Tez yordam”ning kechikib borishiga nima sabab bo‘layotgani izoh berdi. Bu haqda vazirlikning Jamoatchilik bilan aloqalar bo‘limi ma’lum qildi.
Ta’kidlanishicha, kechikishlarga aksariyat holatda yo‘llarda “Tez yordam” mashinasiga yo‘l bermaslik ham sabab bo‘lmoqda.
“Taraqqiy etgan xorijiy davlatlarda ‘Tez yordam’ga yo‘l bo‘shatib berish bo‘yicha haydovchilarda shaxsiy mas’uliyat juda yuqori. Biz esa yo‘llarda ko‘pincha buning aksiga guvoh bo‘lamiz. Mashina chaqiruv signalini yoqib tursa-da bunga parvo qilmaydigan haydovchilar ham yo‘q emas”, — deydi shoshilinch va tez tibbiy yordam masalalari bo‘yicha mahalliy koordinator Obidjon Dilmurodov.
Ma’lum bo‘lishicha, 11-sentabr kuni ertalab soat 07:25 da Toshkent xalqaro aeroportidan Call markazga 60 yoshli kishining sog‘lig‘i yomonlashib, xushidan ketgani haqida chaqiriq tushgan. Bu ma’lumot zudlik bilan Yakkasaroy tumanidagi 10-bo‘limga yetkazilgan. Oradan 1 daqiqa o‘tib, ya’ni, soat 07:26 da “Tez yordam” brigadasi chaqiriq joyiga otlangan. Biroq “Yakkasaroy” to‘yxonasining yonidagi yo‘l tiqilinch bo‘lgani sababli “Tez yordam” 5—6 daqiqa turib qoladi. Mashinaning chirog‘i yonib, chaqiriq signali yangrab tursa-da, mashinaga yo‘l berilmaydi.
Voqea joyiga yetib borgan shifokorlarning muolajalariga qaramay, bemor vafot etadi.
“Shu o‘rinda haydovchilarga murojaat qilib shuni aytmoqchi edikki, qadrli haydovchilar, yoningizda chirog‘i va chaqiruv signalini yoqib kelayotgan ‘Tez yordam’ mashinasining ko‘magiga, balki sizning yaqinlaringizdan biri ko‘z tutib turgandir. ‘Tez yordam’ oshiqqan manzil sizning xonadoningiz bo‘lishi ham ehtimoldan holi emas-ku. Qolaversa, kimningdir farzandi, otasi yoki onasi, joni-jigarining hayoti qil ustida turgan bo‘lishi, siz ozgina himmat qilib, ‘tez yordam’ga yo‘l bersangiz bir insonning hayotini saqlab qolishdek katta savobga sherik bo‘lishingiz mumkin”, — deyiladi xabarda.
Izoh (0)