Соғлиқни сақлаш вазирлиги баъзи ҳолларда чақириқ жойига «Тез ёрдам»нинг кечикиб боришига нима сабаб бўлаётгани изоҳ берди. Бу ҳақда вазирликнинг Жамоатчилик билан алоқалар бўлими маълум қилди.
Таъкидланишича, кечикишларга аксарият ҳолатда йўлларда «Тез ёрдам» машинасига йўл бермаслик ҳам сабаб бўлмоқда.
«Тараққий этган хорижий давлатларда ‘Тез ёрдам’га йўл бўшатиб бериш бўйича ҳайдовчиларда шахсий масъулият жуда юқори. Биз эса йўлларда кўпинча бунинг аксига гувоҳ бўламиз. Машина чақирув сигналини ёқиб турса-да бунга парво қилмайдиган ҳайдовчилар ҳам йўқ эмас», — дейди шошилинч ва тез тиббий ёрдам масалалари бўйича маҳаллий координатор Обиджон Дилмуродов.
Маълум бўлишича, 11 сентябрь куни эрталаб соат 07:25 да Тошкент халқаро аэропортидан Call марказга 60 ёшли кишининг соғлиғи ёмонлашиб, хушидан кетгани ҳақида чақириқ тушган. Бу маълумот зудлик билан Яккасарой туманидаги 10-бўлимга етказилган. Орадан 1 дақиқа ўтиб, яъни, соат 07:26 да «Тез ёрдам» бригадаси чақириқ жойига отланган. Бироқ «Яккасарой» тўйхонасининг ёнидаги йўл тиқилинч бўлгани сабабли «Тез ёрдам» 5—6 дақиқа туриб қолади. Машинанинг чироғи ёниб, чақириқ сигнали янграб турса-да, машинага йўл берилмайди.
Воқеа жойига етиб борган шифокорларнинг муолажаларига қарамай, бемор вафот этади.
«Шу ўринда ҳайдовчиларга мурожаат қилиб шуни айтмоқчи эдикки, қадрли ҳайдовчилар, ёнингизда чироғи ва чақирув сигналини ёқиб келаётган ‘Тез ёрдам’ машинасининг кўмагига, балки сизнинг яқинларингиздан бири кўз тутиб тургандир. ‘Тез ёрдам’ ошиққан манзил сизнинг хонадонингиз бўлиши ҳам эҳтимолдан ҳоли эмас-ку. Қолаверса, кимнингдир фарзанди, отаси ёки онаси, жони-жигарининг ҳаёти қил устида турган бўлиши, сиз озгина ҳиммат қилиб, ‘Tез ёрдам’га йўл берсангиз бир инсоннинг ҳаётини сақлаб қолишдек катта савобга шерик бўлишингиз мумкин», — дейилади хабарда.
Изоҳ (0)