«Ўзтрансгаз» акциядорлик жамиятига қарашли минтақавий газ таъминоти корхоналарининг 2018 йил ва 2019 йилнинг 1-чорагида тадбиркорлик субъектларига табиий газ етказиб бериш борасидаги фаолияти Монополияга қарши курашиш қўмитаси томонидан ўрганилди.
Қўмита матбуот хизматининг маълум қилишича, ўрганишлар натижасида газ таъминоти корхоналари томонидан 188 миллиард сўм даромад ноқонуний ўзлаштирилгани аниқланган. Республика бўйича 8 701 та ҳолатда минтақавий газ таъминоти корхоналари томонидан белгиланган тарифларнинг асоссиз оширилиши ва олдиндан тўланган тўловларни ҳисобга олмаслик каби қонун бузилишларга йўл қўйилган.
Қайд этилишича, амалдаги қонунчиликка мувофиқ, тариф ўзгарган ҳолатларда истеъмолчи етказиб бериладиган табиий газ учун олдиндан тўлов тўланган кундан эътиборан кейинги келадиган 2 ой мобайнида қўшимча тўлов тўлашдан озод этилади.
Масалан, пишган ғишт, цемент, асфалт ишлаб чиқариш, шунингдек, оҳактош ва гипсни ишлаб чиқариш ва қайта ишлаш билан шуғулланувчи корхоналар учун, ресторанлар, кафелар, тантаналар ўтказиладиган бошқа объектлар учун табиий газнинг оширилган тарифлари қўлланилади.
Наманган вилояти, Тўрақўрғон туманида фаолият юритаётган «Давр металл» МЧЖ томонидан 2018 йилнинг февраль ойида фойдаланилган 58 157 метр куб табиий газ учун белгиланган 263,4 сўм ўрнига 1000 сўмдан ҳақ ҳисобланган, натижада газ таъминоти корхонаси томонидан 42,8 миллион сўм асоссиз фойда олинган.
Шунингдек, «Гулобод Осиё Парранда» МЧЖ томонидан 2018 йилнинг 1 ноябрь ҳолатига кўра 34,4 миллиард сўм олдиндан тўланган сумма ҳисобга киритилмаган ва натижада 2018 йилнинг 1 ноябридан тарифларни ошиши муносабати билан жамият қўшимча тўловларни тўлашдан озод этилмаган.
Аниқланган қонун бузилиш ҳолатларини вилоятлар кесимида қуйидагича кўринишда:
- Бухоро вилояти бўйича — 300 ҳолатда 407,6 миллион сўм;
- Жиззах вилояти бўйича — 620 ҳолатда 1 942,5 миллион сўм;
- Қашқадарё вилояти бўйича — 516 ҳолатда 88 019,9 миллион сўм;
- Навоий вилояти бўйича — 22 ҳолатда 59 150,4 миллион сўм;
- Наманган вилояти бўйича — 302 ҳолатда 1 770,2 миллион сўм;
- Самарқанд вилояти бўйича — 3737 ҳолатда 11 935,0 миллион сўм;
- Сирдарё вилояти бўйича — 56 ҳолатда 119,5 миллион сўм;
- Сурхондарё вилояти бўйича — 509 ҳолатда 10 534,1 миллион сўм;
- Тошкент вилояти бўйича — 1203 ҳолатда 3 290,4 миллион сўм;
- Фарғона вилояти бўйича — 23 ҳолатда 240,0 миллион сўм;
- Хоразм вилояти бўйича — 1413 ҳолатда 10 866,3 миллион сўм.
Изоҳ (0)