O‘zbekiston musulmonlari idorasi ijtimoiy tarmoqlarda tarqalgan “ba’zi masjidlar yopilar ekan, ayrim imomlar ishdan bo‘shar ekan”, degan gap-so‘zlarga munosabat bildirdi.
So‘nggi yillarda O‘zbekistonda 24 ta yangi masjid ochildi. Ular qatorida namozxonlarga tuhfa etilgan Qoraqalpog‘istondagi “Imom Eshon Muhammad”, Toshkent shahridagi “Suzuk ota”, “Imom at-Termiziy”, “Shayx Muhammad Sodiq Muhammad Yusuf”, Surxondaryo viloyatidagi “Hakim Termiziy”, Xorazm viloyatidagi “Oxun bobo” va Farg‘ona viloyatidagi “Chiligijiyda” kabi masjidlarni alohida ko‘rsatish mumkin.
“Shuningdek, respublikada 106 ta masjid to‘liq yangidan qurildi, 231 ta masjid kapital ta’mirdan chiqarildi. Bunday ulug‘vor ishlar O‘zbekistonda shiddat bilan davom etmoqda.
Yana bir jihat, aslida masjidlarni yopish masalasi qandaydir mansabdor shaxsning vakolatiga kirmaydi, balki Vazirlar Mahkamasining 2018-yil 31-maydagi 409-son qarori asosida ijro qilinadi.
Shuningdek, masjid imom-xatibini ishga tayinlash va lavozimidan ozod etish masalasi ham O‘zbekiston musulmonlari idorasi tomonidan amalga oshiriladi.
Demak, huquqiy tamoyillarni inkor etish, O‘zbekiston aholisining haq-huquqlari, diniy qadriyatlari va ehtiyojlariga hurmatsizlik ko‘rsatishga hech kimning haqi yo‘q.
O‘zbekiston musulmonlari idorasi islom shiorlari, imom-domlalar va masjidlarga nisbatan bildirilgan har qanday nomaqbul fikrlarga nisbatan doimo murosasizdir”, — deyiladi xabarda.
Izoh (0)