Inson huquqlari bo‘yicha milliy markaz G‘aniyev haydab yuborgan bemor va ro‘molli ayol bilan bog‘liq masalalarni hal qilolmasligini bildirdi

Farg‘ona viloyat hokimi Shuhrat G‘aniyev o‘tgan hafta boshida o‘tgan selektor yig‘ilishida so‘zlagan nutqining audio yozuvi jamoatchilikka oshkor bo‘ldi. Hokim yig‘ilishda Marg‘ilondagi kasalxonadan yaktak-ishton kiygan bemorni haydaganini aytdi. Bundan tashqari, viloyat hokimi ro‘mol o‘ragan jurnalistni tadbirdan haydagani, jurnalistning xorijiy mehmonni kutib olishga ro‘mol va rangli ko‘ylakda chiqqani yoqmaganini ham ta’kidlab o‘tgan.

Inson huquqlari bo‘yicha milliy markaz matbuot kotibi G‘ulom Mirzayev markazning huquqshunos-mutaxassis fikrlariga tayanib markaz bevosita bu hodisa yuzasidan hech qanday o‘rganib chiqish vakolatiga ega emasligini aytdi va quyidagilarni bildirdi:

Bu bilan sud shug‘ullanishi kerak. Agar markaz fuqaro murojaat qilmasidan shug‘ullanadigan bo‘lsa, qonunchilik buziladi. Markazga 47 yoshli fuqaro ham, jurnalist ham murojaat qilmagan. Ular murojaat qilsagina, bu masala ko‘rib chiqiladi. O‘shandayam, bevosita hal qilish vakolatiga ega emas. Markaz murojaatni sudga yuboradi.

Inson huquqlari bo‘yicha O‘zbekiston Respublikasi milliy markazining nizomi tasdiqlangan. Prezident markazga tegishli vazifalarni belgilab bergan. Markaz inson huquqlari sohasidagi O‘zbekistonning xalqaro majburiyatlarini bajarish bo‘yicha davlat organlari va boshqa tashkilotlarning hamkorligini, milliy ma’ruzalar tayyorlanishini, Inson huquqlarini himoya qilish bo‘yicha xalqaro tashkilotlar bilan hamkorlikni kengaytirishni ta’minlovchi davlat organi hisoblanadi.

Hokimning fuqarolarga nisbatan qilgan ishi, bu xususiy masala. Uni aytayotgan gapini qonunga to‘g‘ri yoki noto‘g‘riligini sud hal qiladi. Bu fuqarolar o‘z huquqini talab qilib murojaat qilmagan ekan, bu yerda markazning aybi bor. Demak, markaz huquqiy targ‘ibot darajasini oshirishi kerak. Inson o‘zini huquqini chuqurroq o‘rganib olishi kerak. Mamlakatda siyosiy jarayonlar ketyapti. Har bir tashkilotni o‘zini vakolati bor. Bir idora boshqa tashkilotning vakolatini o‘z zimmasiga ololmaydi. Markaz ijtimoiy tarmoqda chiqqan xabarlarda aytilganidek, Farg‘ona viloyati hokimining bu ishi bilan shug‘ullanmaydi. Shu fuqarolar rasman murojaat qilishlari kerak. Keyin biz o‘rganib chiqamiz. Tegishli tashkilotga shu masala bo‘yicha tavsiyaviy huquqni tiklab berish vakolatiga ega bo‘lgan organlarga jo‘natamiz, xolos.

G‘ulom Mirzayev, Inson huquqlari bo‘yicha milliy markaz matbuot kotibi