Mudofaa vazirligi “Chimyon” tog‘ tayyorgarligi o‘quv-mashqlar markazida harbiy xizmatchilarning jismoniy-taktik imkoniyatlarini oshirishga qaratilgan “Tog‘ sharpasi” o‘quv kurslari o‘tkazilmoqda, deb xabar beradi Mudofaa vazirligi axborot va ommaviy kommunikatsiyalar departamenti.
Harbiy xizmatchilar kunduzgi va tungi otish, razvedka va aloqa, hududga muvofiq niqoblanish, shartli bemorni favqulodda evakuatsiya qilish, pistirmadan hujum, shartli dushmanni qurshab olish, daryodan kechuv, jarlik va daralar aro kanat orqali xavfsiz o‘tish yo‘li hozirlash, shuningdek, boshqa o‘nlab murakkab jangovar vazifalarni guruh va yakka tartibda bajarib, o‘zlarining jangovar shayligini yuksaltirmoqda.
“Aksariyat harbiy xizmatchilar ushbu o‘quv mashg‘ulotlarida ilk bor qatnashayotganiga qaramay, yaxshi natijalarga erishmoqdalar, kundan kunga tajribalari oshyapti. Ayni damda ‘Ko‘ksuv’ darasidan kanat orqali shartli yaradorni olib o‘tish, dengiz sathidan 2000 metr balandlikda tungi va kunduzgi otish mashg‘ulotlari samarali ravishda amalga oshirildi. ‘Tog‘ sharpasi’ o‘quv kurslarida a’lo baho olgan harbiy xizmatchilar qishki o‘quv-mashg‘ulotlariga jalb etiladi”, – deydi kapitan Farrux Toshev.
Izoh (0)