O‘zbekistonda ayni kunlarda Adliya vazirligi tomonidan “Adliya tadbirkorga do‘st” loyihasi amalga oshirilmoqda. Bu haqda “Huquqiy axborot” kanali ma’lum qildi.
Mazkur loyiha doirasida “Tadbirkorni homiylikka majburlama!” shiori ostida tadbirkorlarni noqonuniy homiylik ishlariga jalb qilishga qarshi aksiya e’lon qilindi. Ushbu aksiya oktabr oyi davomida o‘tkaziladi.
Aksiya doirasida ijtimoiy tarmoqlar orqali hamda hududiy adliya organlari tomonidan respublikaning barcha hududlarida so‘rovlar o‘tkazish, shuningdek, noqonuniy homiylikning barcha ko‘rinishlariga qarshi zarur chora-tadbirlarni ko‘rish rejalashtirilgan.
Shuningdek, ushbu aksiya orqali tadbirkorlik subyektlarini homiylik va xayriya yordami ko‘rsatish ishlariga majburiy jalb qilish, ularga nisbatan ma’muriy va boshqa choralarni qo‘llash tahdidi ostida yig‘ilishlar va boshqa tadbirlarni o‘tkazish holatlarini aniqlash bo‘yicha so‘rovlar o‘tkaziladi.
So‘rovnomada anonim ravishda yoki shaxsni ko‘rsatgan holda ushbu havola orqali ishtirok etish mumkin. Shaxsini ko‘rsatgan ishtirokchilarning tadbirkorlik huquqlarini tiklash yuzasidan zarur choralar ko‘riladi.
Bundan tashqari, mazkur holatlarga barham berish maqsadida tadbirkorlarning noqonuniy homiylikka jalb qilishning har qanday ko‘rinishi yuzasidan @tadbirkor_adliyabot yoki 1008 raqamiga murojaat qilish mumkin.
“Eslatib o‘tamiz, tadbirkorlik subyektlarini homiylikka va boshqa tadbirlarga majburiy jalb etish uchun Ma’muriy javobgarlik to‘g‘risidagi kodeksning 241, 4-moddasida hamda Jinoyat kodeksining 19, 4-moddasida javobgarlik belgilangan”, — deyiladi xabarda.
Izoh (0)