AQShga tashrif buyurgan Tashqi ishlar vaziri Abdulaziz Komilov boshchiligidagi delegatsiya Osiyoda hamkorlik va ishonch choralari bo‘yicha kengashga (OHIChK) a’zo davlatlar vazirlari uchrashuvida ishtirok etdi. Bu haqda TIV matbuot xizmati ma’lum qildi.
Majlis davomida ishtirokchilar mintaqaviy va xalqaro xavfsizlik, barqaror iqtisodiy rivojlanishni ta’minlash, madaniy-gumanitar kooperatsiyaga doir keng ko‘lamli masalalar, shuningdek, Afg‘onistondagi vaziyatni muhokama qildi.
O‘zbekiston delegatsiyasi rahbari o‘z nutqida so‘nggi yillarda Osiyoda umumiy va ajralmas xavfsizlik makonini yaratish uchun OHIChK to‘laqonli xalqaro muloqot maydonchasiga aylanganini ta’kidladi.
Vazir, shuningdek, Tojikiston tomonini tashkilotga muvaffaqiyatli raisligi bilan tabrikladi va 2020-yilga mo‘ljallangan OHIChK tadbirlar rejasini qo‘llab-quvvatladi. Ushbu reja O‘zbekiston tashabbusi bilan yoshlarning radikallashishiga qarshi kurashish bo‘yicha xalqaro konferensiyalar o‘tkazishni nazarda tutadi.
Shu munosabat bilan Abdulaziz Komilov yoshlarning barkamol rivojlanishi va o‘zini namoyon qilishi uchun qulay shart-sharoitlar yaratishni maqsad qilgan BMT Yoshlar huquqlari to‘g‘risidagi xalqaro konvensiyani ishlab chiqish va qabul qilishda birgalikda harakat qilishga chaqirdi.
Izoh (0)