BMTning Nyu-Yorkdagi shtab-kvartirasida 60 dan ortiq davlat va hukumat rahbarlari hamda qator xalqaro tashkilotlar vakillari ishtirok etgan Iqlim harakatlari bo‘yicha sammit bo‘lib o‘tdi. Bu haqda TIV matbuot xizmati xabar bermoqda.
O‘zbekiston delegatsiyasini Oliy Majlis Qonunchilik palatasi spiker o‘rinbosari Bori Alixonov boshqardi.
Delegatsiya tomonidan mamlakatda ishlab chiqilgan sanoatni modernizatsiyalash, energosamaradorlikni oshirish, qayta tiklanuvchi energiya manbalarini rivojlantirishga qaratilgan Yashil iqtisodiyotga o‘tish strategiyasi doirasida Parij kelishuvi me’yorlarini bajarilishi to‘g‘risida ma’lumot berildi.
Jumladan, joriy yil iyul oyida qabul qilingan “Qayta tiklanuvchi energiya manbalaridan foydalanish to‘g‘risida”gi qonunga muvofiq, 2025-yilga kelib bunday manbalarning energetika quvvatlaridagi ulushini 20 foizgacha yetkazish rejalashtirilmoqda.
Xalqaro energetika agentligi ma’lumotlariga ko‘ra, O‘zbekistonda 2010—2016-yillar davomida yoqilg‘i ishlatilishi tufayli hosil bo‘lgan karbonat angidrid gazi tashlanmalari 97,6 million tonnadan 85,3 million tonnagacha kamaygan. O‘zbekiston shu tariqa 2030-yilga kelib bunday tashlanmalar hajmini 10 foizga kamaytirishga erishishi kutilmoqda va bu mamlakat zimmasiga olgan majburiyatlarga mos keladi.
Xorijlik hamkorlarga, shuningdek, 25-oktabrda BMT shafe’ligida Nukusda o‘tkazilishi rejalashtirilgan “Orolbo‘yi — ekologik innovatsiyalar va texnologiyalar hududi” xalqaro anjumani haqida ma’lumotlar taqdim etildi.
Izoh (0)