Тез тиббий ёрдам кечикиши сабабларидан бири асоссиз чақирувлардир, деб хабар беради Соғлиқни сақлаш вазирлиги Жамотчилик билан алоқалар бўлими.
«Бугунги кунда «тез ёрдам»га тушаётган мурожаатларнинг 30 фоиздан кўпроғини ана шундай асоссиз чақириқлар ташкил этади. Хўш, бу мурожаатчилар кимлар, деган савол туғилиши табиий. Буларнинг аксарияти сурункали касаллиги бор беморлардир. Пойтахтимиздаги ‘тез ёрдам’ хизматига уларнинг баъзилари йилига 500 мартадан ҳатто 1000 мартагача мурожаат қилади», — дейди Шошилинч ва тез тиббий ёрдам масалалари бўйича маҳаллий координатор Обиджон Дилмуродов.
Тошкент шаҳар тез тиббий ёрдам станцияси бош шифокор ўринбосари Илҳом Аслоновнинг таъкидлашича, сурункали касалликларни даволаш «тез ёрдам» шифокорларининг вазифаси ҳисобланмайди.
« ‘Тез ёрдам’ шифокори касалликнинг ҳаёт учун хавф солиши мумкин бўлган белгиларини бартараф этади, холос. Бу беморга вақтинча енгиллик беради. Бемор дарддан тўла халос бўлиши учун умумий амалиёт шифокори назоратида туриб ёки шифохонада ётиб даволаниши керак.
Ана шундай асоссиз чақириқлар туфайли ‘тез ёрдам’ хизматида тиғизлик юзага келади. Натижада шошилинч тиббий ёрдамга ҳақиқатан муҳтож бўлган беморларга ўз вақтида етиб бориш имконияти чекланмоқда», — дейди Илҳом Арслонов.
Қайд этилишича, «тез ёрдам»ни дори-дармон ва тиббий буюмлар билан таъминлаш сўнгги уч йил ичида 5,2 баробарга кўпайди. Бугунги кунда ҳар 13 минг нафар аҳолига битта «тез ёрдам» машинаси тўғри келади. Бу халқаро стандартларга тўла мосдир.
Изоҳ (0)