Xiva shahrida 14—16-sentabr kunlari bo‘lib o‘tgan xalqaro “Raqs sehri” festivali yakunlandi. Bu haqda “Daryo”ga Xorazm viloyati turizmni rivojlantirish departamenti matbuot xizmati xabar berdi.
Ma’lum qilinishicha, festivalda Angliya, Italiya, Fransiya, Niderlandiya, Rossiya, Malayziya, Hindiston, Xitoy, Indoneziya, Polsha, Gruziya, Ozarbayjon, Qozog‘iston, Turkmaniston va Tojikistondan 50 ga yaqin ishtirokchi raqqos va raqs guruhlari qatnashgan. Bundan tashqari, O‘zbekstonning turli hududlari va xorijiy davlatlardan kelgan san’atkorlar o‘z badiiy chiqishlari bilan ishtirok etgan.
Festival doirasida milliy liboslar ko‘rgazmasi bo‘lib o‘tdi. Unda Xorazm viloyatining iqtidorli dizaynerlarining liboslar kolleksiyasi namoyish etildi. Festival davomida animatsion shoular, sahnalashtirilgan tomoshalar, qo‘g‘irchoq teatri, hunarmandlar ko‘rgazmasi, milliy taomlar, xalq o‘yinlari, tasviriy va amaliy san’at ko‘rgazmalari ham o‘tkazilgan.
Festivalning ikkinchi kunida milliy xalq o‘yinlari bo‘yicha musobaqa, tasviriy va amaliy san’at ko‘rgazmasi, “O‘zbekiston Milliy raqs san’ati” fotoko‘rgazmasi hamda stilist va sartaroshlar tanlovi tashkil etilgan.
“Raqs sehri” an’anaviy xalqaro festivali doirasida Urganch tumani “Turkmanlar” mahallasidagi “O‘zbek-Turkman do‘stlik uyi”da “Raqs san’atida milliy an’analarning ahamiyati” mavzuyida ilmiy-amaliy anjuman o‘tkazilgan. Unda raqs san’ati tarixi va amaliyoti borasida ilmiy izlanishlar olib borayotgan olimlar, festival mehmonlari, talaba yoshlar ishtirok etgan.
Anjuman yakunida “Ulli hovli” majmuasida mehmonlar uchun milliy hunarmandchilik ko‘rgazmasi hamda Urganch tumani madaniyat bo‘limi, O‘zbek-turkman do‘stlik jamiyati va Qozoq milliy madaniy markazi hamkorligida konsert dasturi namoyish etilgan.
Avvalroq Xorazmda “Raqs sehri” xalqaro festivaliga start berilgani haqda xabar bergandik.
Izoh (0)