Qashqadaryo viloyat Bandlik bosh boshqarmasi boshlig‘i Sarvar Ahmedov avvalroq viloyatda majburiy mehnat haqida xabar bergan mahalliy OAVlardan ko‘ra xorij axborotiga ko‘prok e’tibor berganini va ular tarqatgan xabarga asoslanib viloyatdagi majburiy mehnat sonini aniqlaganini tan oldi, deya xabar berdi “Daryo” muxbiri.
18-sentabr, chorshanba kuni Qashqadaryo viloyat Bandlik bosh boshqarmasi mas’ullari, jurnalist hamda blogerlar ishtirokida bo‘lib o‘tgan davra suhbatida joriy yilning o‘tgan davri mobaynida viloyatda 12 marotaba majburiy mehnatga jalb qilish holati aniqlanganligi ta’kidlandi.
Muloqot davomida “Daryo” muxbiri 2018-yil oktabr oyida internet saytlarida Qarshi tumani maktabgacha ta’lim bo‘limi tarbiyachilarining majburiy tartibda paxta terimiga jalb qilingan holati yoritilganligini, biroq boshqarma mas’ullari nima uchun ushbu holatga e’tibor bermagani bilan qiziqdi. Va boshqarma mas’ullari tomonidan aniqlangan 12 ta holatdagi majburiy mehnatning aksariyati xorij OAVsi, xususan, “Ozodlik” radiosining Telegram kanalida chop etilishi o‘rtasida qanday bog‘liqlik bor, deya savol berdi.
Qashqadaryo viloyat Bandlik bosh boshqarmasi boshlig‘i Sarvar Ahmedov “Daryo” muxbiri savoliga javob berar ekan, o‘sha kezlarda majburiy mehnat xususida xabar bergan mahalliy OAVdan ko‘ra ko‘proq xorij OAVsi tarqatgan xabarlarga e’tibor berganini, Qarshi tumanidagi bog‘cha tarbiyachilarining paxta terimiga jalb qilinishiga e’tibor qaratilmaganligini tan olib, “Bu — bizning xatomiz”, — dedi. Bundan keyin bu xato takrorlanmasligiga va’da berdi.
Eslatib o‘tamiz, bundan avvalroq Qashqadaryoda maktab direktorlari o‘qituvchi va o‘quvchilarni majburiy mehnatga jalb qilgani va bu “bebosh”ligi uchun jazolangani xususida xabar berilgan edi.
Izoh (0)