Хивада «Рақс сеҳри» халқаро фестивали якунланди (фото)

Хива шаҳрида 14—16 сентябрь кунлари бўлиб ўтган халқаро «Рақс сеҳри» фестивали якунланди. Бу ҳақда «Дарё»га Хоразм вилояти туризмни ривожлантириш департаменти матбуот хизмати хабар берди.

Маълум қилинишича, фестивалда Англия, Италия, Франция, Нидерландия, Россия, Малайзия, Ҳиндистон, Хитой, Индонезия, Польша, Грузия, Озарбайжон, Қозоғистон, Туркманистон ва Тожикистондан 50 га яқин иштирокчи раққос ва рақс гуруҳлари қатнашган. Бундан ташқари, Ўзбекстоннинг турли ҳудудлари ва  хорижий давлатлардан келган санъаткорлар ўз бадиий чиқишлари билан иштирок этган.

Фестиваль доирасида миллий либослар кўргазмаси  бўлиб ўтди. Унда Хоразм вилоятининг иқтидорли дизайнерларининг либослар коллекцияси намойиш этилди. Фестиваль давомида анимацион шоулар, саҳналаштирилган томошалар, қўғирчоқ театри, ҳунармандлар кўргазмаси, миллий таомлар, халқ ўйинлари, тасвирий ва амалий санъат кўргазмалари ҳам ўтказилган.

Фестивалнинг иккинчи кунида миллий халқ ўйинлари бўйича мусобақа, тасвирий ва амалий санъат кўргазмаси, «Ўзбекистон Миллий рақс санъати» фотокўргазмаси ҳамда стилист ва сартарошлар танлови ташкил этилган.

«Рақс сеҳри» анъанавий халқаро фестивали доирасида Урганч тумани «Туркманлар» маҳалласидаги «Ўзбек-Туркман дўстлик уйи»да «Рақс санъатида миллий анъаналарнинг аҳамияти» мавзуйида илмий-амалий анжуман ўтказилган. Унда рақс санъати тарихи ва амалиёти борасида илмий изланишлар олиб бораётган олимлар, фестиваль меҳмонлари, талаба ёшлар иштирок этган.

Анжуман якунида «Улли ҳовли» мажмуасида меҳмонлар учун миллий ҳунармандчилик кўргазмаси ҳамда Урганч тумани маданият бўлими, Ўзбек-туркман дўстлик жамияти ва Қозоқ миллий маданий маркази ҳамкорлигида концерт дастури намойиш этилган.

Аввалроқ Хоразмда «Рақс сеҳри» халқаро фестивалига старт берилгани ҳақда хабар бергандик.