Rossiyaning Yekaterinburg shahri mezbonlik qilayotgan boks bo‘yicha Jahon chempionatining to‘qqizinchi kunida O‘zbekiston boks terma jamoasining yana to‘rt nafar vakili chorak finalga chiqdi.
- 57 kg vazn toifasi vakili Mirazizbek Mirzahalilov 1/8 finalda marokashlik Muhammad Hamutga qarshi ringga chiqib, jangni 4:1 hisobida o‘z foydasiga hal etdi va chorak finalga yo‘l oldi.
-69 kg vazn toifasi vakili Bobousmon Boturov esa navbatdagi jangini amerikalik Delante Jonsonga qarshi olib borib, 3 raund natijasiga ko‘ra raqibini 5:0 hisobida taslim qildi. Natijada Boturov ham chorak final yo‘llanmasini qo‘lga kiritdi.
-81 kg vazn toifasida O‘zbekiston sharafini himoya qilayotgan Dilshodbek Ro‘zmetov esa nimchorak final bosqichida ruminiyalik Andrei Aradauni mag‘lub etib (5:0) chorak finalga chiqdi.
Allaqachon professional boksda faoliyatini davom ettirayotgan +91 kg vazn toifasi vakili Bahodir Jalolov kunning so‘nggi jangida ukrainalik Sonte Rogavaga qarshi ringga ko‘tarilib, raqibi ustidan g‘alabaga erishdi. Natijada Bahodir ham keyingi bosqich yo‘llanmasini qo‘lga kiritdi.
Shu tariqa O‘zbekiston terma jamoasining besh nafar a’zosi Jahon chempionatining chorak finalida jang qiladigan bo‘ldi.
Eslatib o‘tamiz, hozirga qadar musobaqa bilan O‘zbekistonning uch nafar bokschisi xayrlashdi — Elnur Abduraimov, Fanat Qahramonov hamda Sanjar Tursunov.
Chorak finalga chiqqan bokschilar
- -52 kg: Shahobiddin Zoirov
- -57 kg: Mirazizbek Mirzahalilov
- -69 kg: Bobousmon Boturov
- -81 kg: Dilshodbek Ro‘zmetov
- +91 kg: Bahodir Jalolov
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)