Saloh Mertensga, Klopp esa Anchelottiga qarshi. “Napoli”—“Liverpul” to‘qnashuvi haqida

Futbol muxlislari orziqib kutgan Yevropaning eng nufuzli musobaqasi — Chempionlar Ligasi 2019/20-yilgi mavsumi 17-sentabr, seshanba kuni start oladi.

Qur’a guruh bosqichidayoq bir nechta grand klublarni bir-biriga ro‘baro qilib qo‘ydi. Shu jumladan, eski tanishlar — “Napoli” hamda “Liverpul”ni ham. O‘tgan mavsumda ham ushbu klublar guruh bosqichida bir-biriga qarshi o‘ynagan edi. O‘shanda tomonlar o‘z maydonidagi o‘yinlarni bir xil hisobda o‘z foydasiga hal etgandi — 1:0. Guruh bosqichi so‘ngi turidan keyin ikkala klubda ham 9 ochko mavjud edi. Ammo “Liverpul” to‘plar nisbati evaziga pley-offga yo‘l olgandi. “Napoli” esa ishtirokini Yevropa Ligasida davom ettirishga majbur bo‘lgandi. Bu safar esa ikkala jamoa yana bir guruhda. Faqat PSJ hamda “Srvena Zvezda”siz. Ularning o‘rnini esa “Genk” hamda “Zalsburg” klublari bildirmaslikka harakat qilib ko‘radi. Xo‘sh, jamoalar ushbu bellashuvga qanchalik tayyor? Uchrashuv atrofida nimalar yuz bermoqda? Quyida shu kabi savollarga javob izlab ko‘ramiz.

“Liverpul”

“Liverpul” — Chempionlar Ligasining amaldagi g‘olibi. Mersisayd klubi o‘tgan yili “Napoli”ga qarshi so‘nggi tur bahsida Alissoning ikkinchi bo‘lim oxirlaridagi qoyilmaqom seyvi tufayli guruhdan chiqishni uddalagan edi. Bu safar Alisson “qizillar”ga yordam bera olmaydi. Ammo Yurgen Kloppa jamoasining kayfiyati a’lo darajada. “Liverpul” Premyer Ligada 5 ta turdan so‘ng 15 ochko jamg‘argan holda yaqqol peshqadam bo‘lib turibdi. Klubning hujum triosi Saloh—Mane—Firmino o‘z ishini allaqachon boshlab yuborgan. Van Deyk boshchiligidagi himoya qo‘rg‘oni esa o‘tgan mavsumdagidek ishonchli harakat qilmoqda. Veynaldum hamda Fabinyo tandemi esa o‘ziga yuklatilgan vazifani a’lo darajada uddalamoqda. Ularga jamoa sardori Jordan Henderson ko‘makchi bo‘lib turibdi. Hammasidan ham “Liverpul”ning mavsumni a’lo darajada boshlagani “Napoli”ga katta qiyinchilik tug‘dirishi kutilayotgan holat, nazarimizda. Safarda o‘ynashiga qaramay Klopp shogirdlarini ushbu uchrashuvning favoriti sifatida e’tirof etsa bo‘ladi. Hattoki, bu holatga “qizillar”ning o‘tgan mavsum Chempionlar Ligasi guruh bosqichidagi barcha safar o‘yinlarini mag‘lubiyat bilan yakunlagani ham ta’sir ko‘rsatadi deb o‘ylash fikridan yiroqmiz.

“Napoli”

Karlo Anchelotti jamoasi “Liverpul”dan farqli o‘laroq mavsum startini barqaror o‘tkaza olayotgani yo‘q. A Seriyaning ilk turida “Fiorentina” ustidan 4:3 hisobida g‘alaba qozongan “Napoli” 2-turda esa “Yuventus”ga xuddi shu tarzda mag‘lub bo‘ldi. 3-turda esa “Sampdoriya” mag‘lub etildi — 2:0. Markaziy himoya chizigi‘ uchun “Roma”dan olib kelingan Kostas Manolas hozircha haddan tashqari maqtab yuborilayotgan (klub prezidenti tomonidan) Kalidu Kulibali bilan bir-birini to‘liq tushunib olmaganini shu ikkala o‘yinoq tasdiqlab turibdi. Bu borada Karlo otaning oldida hali qilinadigan ishlar ko‘pligi oydinlashadi. Muxlislar klub yarim himoya va hujum chizig‘idan esa unchalik xavotir olmasa ham bo‘laveradi. Boisi Kalyexon—Mertens—Insinye triosiga endi meksikalik Irving Losano ham qo‘shildi. Hatto Losano “Yuventus”ga qarshi zaxiradan maydonga tushiboq gol urdi. Marek Hamshik klubni tark etgach, uning o‘rnini Pyotr Zelinski hamda Allan bildirmaslikka harakat qilmoqda. Ularga yordamchi sifatida esa yozgi transferlar vaqtida Elif Elmas olib kelindi. Umuman olganda, “Napoli”ni o‘z maydonida o‘ynashi hisobga olinsa, “Liverpul”ni oldinda oson bo‘lmagan bahs kutib turganini ta’kidlash lozim.

Murabbiylar fikri

Ular bizga qarshi ikki o‘yindan so‘ng musobaqani tark etishiga to‘g‘ri keldi. Shunday ekan, ular bizga qarshi qattiq tayyorgarlik ko‘rgan. “Napoli” chindan ham kuchli jamoa. Bu biz uchun oson o‘yin bo‘lmaydi. Neapolda yaxshi natijaga erishishimiz uchun yetarli darajada kuchli o‘yin ko‘rsatishimiz lozim. Aynan shu narsagina meni xavotirga solmoqdaYurgen Klopp, “Liverpul” bosh murabbiyi

Bizning maqsadimiz — guruhdan chiqish. Yevropaning eng kuchli jamoasiga qarshi o‘ynaymiz. Bu biz uchun muhim tekshiruv bo‘ladi. “Liverpul” katta o‘sishga erishdi. O‘tgan mavsum jamoaga ishonch taqdim etdi. Ammo “Napoli” ham tarkibni kuchaytirib oldi. Jamoam qanday himoyalanish va hujum qilish kerak ekanligini yaxshi biladi. “Napoli” o‘z o‘yinini ko‘rsatishi kerak.

Karlo Anchelotti, “Napoli” bosh murabbiyi

Qiziqarli faktlar

• “Napoli” Yevrokuboklar doirasida biror marta ingliz klublariga o‘z maydonida mag‘lub bo‘lmagan
• “Napoli”ning bu boradagi ko‘rsatkichi: 5 ta g‘alaba, 1 ta durang
• “Liverpul” va “Napoli” rasmiy o‘yinlarda atigi 4 marta to‘qnash kelgan
• “Napoli” rasmiy o‘yinlarda “Liverpul”ni atigi 1 marta mag‘lub etgan (o‘tgan mavsum)
• “Liverpul” esa “Napoli” ustidan ikki marta g‘alaba qozongan.
• Tomonlar o‘rtasidagi bitta bahs durang bilan yakun topgan

Taxminiy tarkiblar