To‘xtamayotgan “Liverpul”, uyg‘ongan “Chelsi” va “Tottenhem”, “kanareykalar”dan tarsaki yegan “Man Siti”. APLda tur tafsilotlari

Futbol bo‘yicha Angliya Premyer ligasining 5-turi 14—16-sentabr kunlari bo‘lib o‘tdi. Odatga ko‘ra tur tafsilotlarini bir sahifaga joylashga harakat qildik.

“Liverpul”—“Nyukasl”

Turning ilk o‘yini “Enfild”da bo‘lib o‘tdi. 4 ta turdan so‘ng yo‘qotishsiz odimlayotgan Yurgen Klopp shogirdlari bu safar “Nyukasl”ni sinovdan o‘tkazdi. O‘yin “qizillar” uchun omadsiz boshlandi. 7-daqiqada mehmonlar a’zosi Yetro Villems gol urib, jamoasini hisobda oldinga olib chiqdi. 28-daqiqaga kelib Sadio Mane Endryu Robertsonning uzatmasini golga aylantirdi. Oradan 12 daqiqa o‘tib Roberto Firminoning uzatmasidan so‘ng darvozabon bilan birga bir chiqib borgan Mane dublga erishdi va mezbonlarni hisobda oldinga olib chiqdi. O‘yinga yakuniy nuqtani qo‘yish Muhammad Salohga nasib etdi. Misrlik hujumchi 72-daqiqada Firminoning zargarona uzatmasini ko‘kka sovurmadi. Natijada Klopp jamoasi ketma-ket 5 ta g‘alabani o‘ziniki qildi va musobaqa jadvalida yakka peshqadam bo‘lib turibdi.

“Tottenhem”—“Kristal Pelas”

Ketma-ket uch turda g‘alaba qozona olmagan Maurisio Pochettino shogirdlari beshinchi turda bor alamini “Kristal Pelas”dan olib qo‘ya qoldi. “Tottenhem” “burgutlar” darvozasiga javobsiz 4 ta gol urdi. Qizig‘i, gollarning barchasi birinchi bo‘limning o‘zida urildi. Gollardan ikkitasiga qit’adoshimiz Son Hyon Min mualliflik qilgan bo‘lsa, Erik Lamela ham o‘z hisobiga bitta gol yozdirib qo‘ydi. Yana bir gol esa Serj Oryening faolligi sabab yuzaga keldi. Faqat uni “Pelas” himoyachisi Patrik van Anholt o‘z darvozasiga joylab qo‘ydi. Shu tariqa “shporlar” o‘z hisobidagi ochkolari sonini 8 taga yetkazib, to‘plar nisbatiga ko‘ra musobaqa jadvalida 3-o‘ringa ko‘tarilib oldi.

“Manchester Yunayted”—“Lester”

O‘zining avvalgi mavqeyini qaytarish harakatidagi “Manchester Yunayted” mazkur turni o‘z maydonida “tulkilar”ga qarshi o‘tkazdi. “Old Trafford” o‘tgan o‘yinda muxlislar atigi bitta gol ko‘rdi, xolos. U ham birinchi bo‘limning 8-daqiqasida penaltidan urildi. Unga Markus Reshford mualliflik qildi. “Qizil iblislar” ushbu g‘alabadan so‘ng hisobidagi ochkolari sonini “Tottenhem”niki kabi 8 taga yetkazib oldi.

“Vulverhempton”—“Chelsi”

Turning eng serhmahsul o‘yini “bo‘rilar” va “aristokratlar” o‘rtasida kechdi. Avvalgi turda “Sheffild Yunayted” bilan durang qayd etib, muxlislarini ranjitgan “Chelsi” bu safar qoyilmaqom o‘yin namoyish etdi. Avvaliga 31-daqiqada Tomori chiroyli va aniq zarbasi bilan London klubini hisobda oldinga olib chiqdi. Oradan 3 daqiqa o‘tib, Temmi Abraham hisobni 0:2 ko‘rinishiga keltirdi. 41-daqiqada yana o‘sha Temmi o‘z hisobiga ikkinchi golni yozdirib qo‘ydi. Tomonlar tanaffusga 0:3 hisobida yo‘l oldi. 55-daqiqada Abraham het-trikka erishdi. 69-daqiqada tinib-tinchimagan Temmi o‘z darvozasiga ham gol urib, avtogol sohibiga aylandi. 85-daqiqada esa yozgi transferlar vaqtida “Milan”dan olib kelingan Patrik Kutrone “bo‘rilar”ning o‘yindagi ikkinchi goliga mualliflik qildi. Bellashuvga yakuniy nuqtani esa so‘nggi daqiqalarda Meyson Maun qo‘ydi — 2:5. Qayd etish joiz, “Chelsi”ning ushbu o‘yindagi barcha golini klub akademiyasi tarbiyalanuvchilari kiritishga erishdi.

“Norvich”—“Manchester Siti”

Tur sensatsiyasi so‘zsiz Norij shahrida qayd etildi. Amaldagi chempion “Manchester Siti” Chempionship g‘olibi bo‘lgan holda Premyer Ligaga qaytgan “Norvich” mehmoni bo‘lib mag‘lubiyatga uchradi. Avvaliga 18-daqiqada Kenli Makklin mezbonlarni hisobda oldinga olib chiqdi. Oradan 10 daqiqa o‘tib Todd Kentuell hisobni 2:0 ko‘rinishiga keltirdi. Birinchi bo‘lim yakunida esa Serxio Aguero hisobni qisqartirishga erishdi. Ikkinchi bo‘lim avvalida esa APLda javlon urayotgan Teyemu Pukki Ederson darvozasiga ham gol urdi. Qayd etish joiz, u bunga qadar “Liverpul” va “Chelsi” kabi grandlar darvozasini ham ishg‘ol qilgandi. Gvardiola shogirdlari esa mag‘lubiyatdan qutulish ilinjida qilgan tinimsiz harakatlari faqatgina 88-daqiqaga kelib o‘z mevasini berdi. Rodri uzoq masofadan aniq zarba berib, hisobni qisqartirdi. Ammo undan ko‘piga “shaharliklar”ning kuchi ham vaqti ham yetmadi.

“Uotford”—“Arsenal”

Dastlabki ikki turda ketma-ket g‘alabalarni qo‘lga kiritib, muxlislari qalbida kelajakka bo‘lgan umidni yoqqan “Arsenal” bu safar o‘sha umidni yana so‘nishi yo‘lida bir qadam tashladi. “Uotford” mehmoni bo‘lgan Unai Emeri shogirdlari bu safar tayyor g‘alabani qo‘ldan boy berdi. Pyer-Emerik Obameyangning 11 daqiqa ichida urgan ikkita goliga mezbonlar ikkinchi bo‘limda Tom Kleverli va Roberto Pereyralarning gollari bilan javob qaytardi. Qayd etish joiz, mezbonlarning ikkala golida ham “Chelsi”ni “Arsenal”ga almashtirgan David Luiz xatoga yo‘l qo‘ydi. Shu tariqa “to‘pchilar”ning g‘alabasiz o‘yinlar seriyasi uchta o‘yinga yetdi.

Tur raqamlarda

• 10 uchrashuvda jami 32 ta gol urildi
• 18 ta gol mezbonlar, 16 tasi esa mehmonlar hisobiga yozildi
• Eng sermahsul bahs: “Vulverhempton” — “Chelsi” 2:5
• Faqat 1 ta o‘yinda 0:0 hisobidagi durang qayd etildi: “Aston Villa” — “Vest Hem”
• Faqatgina 2 ta o‘yinda mehmonlar g‘alaba qozondi.
• 4 nafar futbolchi dublga erishdi: Sadio Mane, Kallum Uilson, Son Hyon Min, Pyer Emerik Obameyang
• 1 nafar futbolchi het-trik qayd etdi: Temmi Abraham
• Ortda qolgan 5 turdan so‘ng ochko yo‘qotmagan bitta klub qoldi — “Liverpul”

Musobaqa jadvali

To‘purarlar ro‘yxati