Россиянинг Екатеринбург шаҳри мезбонлик қилаётган бокс бўйича Жаҳон чемпионатининг тўққизинчи кунида Ўзбекистон бокс терма жамоасининг яна тўрт нафар вакили чорак финалга чиқди.
- 57 кг вазн тоифаси вакили Миразизбек Мирзаҳалилов 1/8 финалда марокашлик Муҳаммад Ҳамутга қарши рингга чиқиб, жангни 4:1 ҳисобида ўз фойдасига ҳал этди ва чорак финалга йўл олди.
-69 кг вазн тоифаси вакили Бобоусмон Ботуров эса навбатдаги жангини америкалик Деланте Жонсонга қарши олиб бориб, 3 раунд натижасига кўра рақибини 5:0 ҳисобида таслим қилди. Натижада Ботуров ҳам чорак финал йўлланмасини қўлга киритди.
-81 кг вазн тоифасида Ўзбекистон шарафини ҳимоя қилаётган Дилшодбек Рўзметов эса нимчорак финал босқичида руминиялик Андреи Арадауни мағлуб этиб (5:0) чорак финалга чиқди.
Аллақачон профессионал боксда фаолиятини давом эттираётган +91 кг вазн тоифаси вакили Баҳодир Жалолов куннинг сўнгги жангида украиналик Сонте Рогавага қарши рингга кўтарилиб, рақиби устидан ғалабага эришди. Натижада Баҳодир ҳам кейинги босқич йўлланмасини қўлга киритди.
Шу тариқа Ўзбекистон терма жамоасининг беш нафар аъзоси Жаҳон чемпионатининг чорак финалида жанг қиладиган бўлди.
Эслатиб ўтамиз, ҳозирга қадар мусобақа билан Ўзбекистоннинг уч нафар боксчиси хайрлашди — Элнур Абдураимов, Фанат Қаҳрамонов ҳамда Санжар Турсунов.
Чорак финалга чиққан боксчилар
- -52 кг: Шаҳобиддин Зоиров
- -57 кг: Миразизбек Мирзаҳалилов
- -69 кг: Бобоусмон Ботуров
- -81 кг: Дилшодбек Рўзметов
- +91 кг: Баҳодир Жалолов
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)