Yevropa Chempionlar Ligasida grandlar jangi: “Borussiya D” — “Barselona” uchrashuvi haqida

17-sentabr, seshanba kuni Yevropa Chempionlar Ligasining guruh bosqichi start oladi. Qur’adan so‘ng “o‘lim guruhi” deya ta’kidlangan “F” guruhida “Borussiya D” o‘z maydonida “Barselona” bilan bahs yuritadi.

Katalonlarga bu safar ham oson guruh duch kelgani yo‘q. O‘tgan yili “Barselona”, “Tottenhem” va “Inter” jamoalari o‘rtasidagi kurash qanday bo‘lgani ko‘pchilikning yodida bo‘lsa kerak. Bu mavsumda “shporlar” o‘rnini borussiyaliklar egalladi va nemislar o‘yin borasida musobaqaning amaldagi finalchisidan qolishmaydi. To‘rtinchi jamoa esa — “Slaviya”. Bu jamoa nom jihatidan buyuk bo‘lmasa-da nimalarga qodir ekanini o‘tgan mavsum Yevropa Ligasida ozmi-ko‘pmi namoyish qila oldi.

E’tiborli jihati bu ikki jamoa 21 yil deganda ilk bor o‘zaro to‘qnash kelmoqda. 1998-yilgi UEFA Superkubogida “Barselona” o‘sha vaqtda Chempionlar Ligasida g‘olib chiqqan “Borussiya”dan ustun kelgandi.

“Borussiya D”

Jamoa yangi mavsumda faqat bir marta “qoqildi”, dortmundliklar “Union”ga qarshi safar o‘yinida imkoniyatni boy berib qo‘ydi. Biroq Favr shogirdlari o‘z maydonida yuz foizlik natija ko‘rsatmoqda. Bundesligadagi so‘nggi bahsda “arilar” jiddiy raqib hisoblangan “Bayer”ni yirik hisobda mag‘lub etdi. Shuningdek, jamoa o‘zining sermahsulligi bilan ham ajralib turibdi.

“Signal-Iduna Park”dagi muxlislikni uzoq tariflash shart emas. Dortmund ishqibozlari o‘z uylarida har qanday raqibni qo‘rquvga sola oladi. Buni Lionel Messi ham o‘yindan avval alohida ta’kidlab o‘tdi. “Barselona”ga qarshi o‘yin nemis klubi to‘purari Pako Alkaser uchun prinsipial ahamiyatga ega hisoblanadi. Ernesto Valverde qo‘l ostida o‘yin amaliyotisiz qolgan futbolchining qalbida o‘ziga xos sportcha alam qolib ketgani tabiiy.

“Barselona”

Ernesto Valverde shogirdlari mavsumni barqaror tarzda boshlay olmadi, bundan tashqari, jamoaning yetakchilari jarohat sabab safdan chiqqandi. Mazkur o‘yinda Usmon Dembele, Neto va Samyuel Umtiti kabi futbolchilar katalonlarga yordam bera olmaydi. Katta ehtimol bilan Lionel Messi ham uchrashuvda to‘liq harakat qila olmaydi. Bir oydan buyon jamoasiga yordam bera olmayayotgan Messi shanba kuni “Valensiya”ga qarshi o‘yinni ham o‘tkazib yubordi. Biroq ertasi kuni “Barsa” matbuot xizmati argentinalik futbolchi Dortmunddagi o‘yinga tayyor ekani ma’lum qilindi. Shuningdek, Usmon Dembele sobiq jamoasiga qarshi o‘yinda maydonga tusha olmaydi.

Biroq “ko‘k-anorranglilar” ishqibozlarini xursand qiladigan voqealar ham bor. La Liga 1-turida jarohat olib bir necha muddat safga qayta olmagan Luis Suares “Valensiya”ga qarshi o‘yinda maydonga tushdi va dublni rasmiylashtirdi. Shuningdek, mazkur bahsda 16 yoshli Ansu Fatining harakatlari “Kamp Nou”da minglab tomoshabinlar olqishiga sabab bo‘ldi.

Qiziqarli faktlar

• “Borussiya” va “Barselona” o‘z chempionatlarining eng sermahsul (har bir o‘yinda o‘rtacha uchta gol) jamoalari hisoblanadi. Dortmundliklar ortda qolgan to‘rtta turda 13 ta to‘p kiritgan bo‘lsa, katalonlar hisobida 12 ta gol bor
• “Barselona” La Ligada to‘pga egalik qilish bo‘yicha yetakchi — o‘rtacha 65,4%. “Borussiya” esa bundan ozgina kamroq ko‘rsatkichga ega — 61,4%
• Bu jamoalar qo‘pol o‘yin ko‘rsatmaslik borasida ham ajralib turadi: “Barselona” bu mavsum to‘rtta turda 7 ta sariq kartochka jamg‘ardi (bir o‘yinda o‘rtacha 1,7). “Borussiya” futbolchilari esa o‘tgan to‘rtta o‘yinda bor-yo‘g‘i bitta sariq kartochkaga loyiq ko‘rilgan
• “Borussiya” so‘nggi o‘nta uy o‘yinining sakkiztasida g‘alabaga erishgan
• “Barselona” so‘nggi oltita safar uchrashuvning bor-yo‘g‘i bittasida muvaffaqiyat qozongan (uchta durang va ikkita mag‘lubiyat)

Taxminiy tarkiblar